ᐊᑐᖅᑕᐅᓚᐅᕐᓯᒪᓐᖏᑦᑐᖅ ᐊᕐᕌᒍᑦᑎᓐᓂ ᓴᖅᑭᖅᑐᖅ ᐊᒻᒪᓗ ᓇᓪᓕᐅᓂᕐᓯᐅᕈᑎᓪᓗᒍ ᓂᕆᕕᔾᔪᐊᓂᒃᑯᑦ!
2018-2019 ᐊᑐᖅᑕᐅᓚᐅᕐᓯᒪᓐᖏᑦᑐᓂᒃ ᓴᖅᑭᕐᕕᐅᔪᖅ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ (ᕿᑭᖅᑕᓂ) ᐊᒥᓱᓄᑦ ᑕᖅᓴᕆᔭᐅᓂᐊᓕᖅᑐᓄᑦ.
ᕿᑭᖅᑕᓂᒃᑯᑦ ᐊᕐᕌᒍᑕᒫᕐᓯᐅᒻᒥᒃ ᑲᑎᒪᓂᖓ ᐊᒻᒪᓗ ᑲᑎᒪᔩᑦ ᑲᑎᒪᔨᖏᑦ ᐱᓇᓱᐊᕈᓯᑦᑎᓐᓂ, ᐱᕕᒃᓴᖃᕐᕕᐅᑦᓯᐊᓚᐅᖅᑐᑦ ᑲᑎᒪᔨᓄᑦ ᐃᖅᑲᓇᐃᔭᖅᑎᓄᓪᓗ ᐱᖕᒪᕆᐅᔪᓂᒃ ᐋᔩᕋᕈᑎᖃᕐᓂᖏᓐᓄᑦ ᑲᔪᓯᐊᑎᓚᐅᖅᑕᑎᓐᓂᒃ ᐊᒻᒪᓗ ᐊᔩᕋᕈᑎᖃᖅᑐᑕ ᑲᒪᒋᔭᐅᕙᓪᓕᐊᒋᐊᖃᕐᓂᐊᓕᖅᑐᓂᒃ ᐊᐅᓚᔾᔭᐃᓂᕐᒥᒃ ᓄᑖᓂᒃ ᐃᑲᔫᓯᐊᑦᓴᓂᒃ ᐃᓄᓐᓄᑦ ᕿᑭᖅᑕᓂ ᓄᓇᓕᒫᖓᓂ.
ᖁᕕᐊᓲᑎᖃᓚᐅᕐᒥᔪᒍᑦ ᑐᓴᕋᓐᓈᖅᑎᑕᐅᓂᒃᑯᑦ, ᐃᓄᓕᖅᑕᓂᒃ ᓂᕆᓪᓗᑕ ᐊᒻᒪᓗ ᓵᓚᒃᓴᐅᓯᖃᑦᑕᑎᑦᓯᓂᕐᒥᒃ ᓄᓇᓕᓐᓂ ᓂᕆᕕᔾᔪᐊᑎᑦᓯᓂᑦᑎᓐᓂ.
ᓄᓇᓕᓐᓂ ᓂᕆᕕᔾᔪᐊᑎᑦᓯᓂᖅ
ᐱᐅᔪᕐᔪᐊᖑᓚᐅᖅᑐᖅ ᓂᕆᕕᔾᔪᐊᑎᑦᓯᓂᕗᑦ ᐃᖃᓗᐃᑦ ᐃᓄᒃᓱᒃ ᐃᓕᓐᓂᐊᕐᕕᐊᓗᓂ ᓯᑕᒻᒥᕐᒥ ᐅᓐᓄᒃᑯᑦ.
500 ᐅᖓᑖᓃᑦᑐᓄᑦ ᓂᕆᔭᖅᑐᕐᕕᐅᓚᐅᖅᑐᒍᑦ ᐊᒻᒪᓗ ᑐᓴᕋᓐᓈᑎᑦᓯᓪᓗᑎᒃ ᑲᒫᓗᑯᑖ ᓂᔾᔭᐅᓯᔭᖅᑏᑦ.
ᐃᓚᒋᔭᐅᓚᐅᕐᒥᔪᑦ ᐅᓄᖅᑐᑦ 2019-2020 ᐃᓕᓐᓂᐊᑲᓐᓂᖅᑐᓄᑦ ᐃᑲᔫᓯᐊᖅᑖᖅᑐᑦ − ᐃᓕᓐᓂᐊᖅᑏᑦ ᓄᓇᕗᒻᒥ ᐅᑭᐅᖅᑕᖅᑐᒥ ᓯᓚᑦᑐᓴᕐᕕᒻᒥ ᖁᔭᓕᒋᐊᖅᑐᓚᐅᖅᑐᑦ ᕿᑭᖅᑕᓂᒃᑯᓐᓂᒃ ᐃᑲᔪᖅᑕᐅᓯᒪᒐᒥᒃ ᐊᒻᒪᓗ ᓯᒃᑭᒥᓂᒃ ᐊᐃᑦᓯᖅᑐᑎᒃ ᐅᑭᐊᑦᓵᒨᖓᔪᓂᒃ ᐃᑲᔫᓯᐊᒃᓴᓂᒃ.
ᓂᕆᕕᔾᔪᐊᑎᑦᓯᓂᕗᑦ ᐃᓱᓕᒍᑎᖃᓚᐅᖅᑐᖅ ᓇᓚᐅᑦᓵᕈᑎᒃᑯᑦ ᐱᐅᔫᑎᕐᔪᐊᓂᒃ ᓵᓚᒃᓴᐅᓯᐊᖅᑐᖃᖃᑦᑕᖅᑐᓂ ᐃᓚᒋᔭᐅᓪᓗᑎᒃ ᓯᑕᒪᑦ ᖃᖓᑦᑕᐅᑏᑦ, ᓯᑕᒪᑦ $50−ᒧᑦ ᓂᐅᕕᕈᓐᓇᐅᑏᑦ ᓂᕿᓂᒃ, ᓱᐴᔫᖅ, ᒥᖅᓱᒐᑦᓴᑦ, ᕿᓰᒃ ᐳᐊᓘᒃ ᐊᒻᒪᓗ ᓱᕈᓯᕐᓄᑦ ᐱᓐᖑᐊᕋᓵᓗᐃᑦ. ᕿᑭᖅᑖᓗᒃ ᑯᐊᐳᕇᓴᒃᑯᑦ (QC) ᑐᓂᓯᓚᐅᖅᑐᑦ ᒪᕐᕉᓐᓂᒃ ᕘᔅᑎᐊᒃᑯᑦ ᖃᖓᑦᑕᐅᑏᓐᓂᒃ ᐊᒻᒪᓗ ᓯᑕᒪᓂᒃ 20 ᒑᓚᓐᓂᒃ ᒑᓯᑖᕈᑎᑦᓴᓂᒃ.
ᐸᕐᓚᔪᐊᓘᓕᓚᐅᕐᒥᔪᑦ ᐃᓱᓕᒍᑎᒋᓪᓗᒍ ᐅᓐᓄᖓᓄᑦ − ᐊᒻᒪᓗ ᐊᖏᕐᕋᓕᓚᐅᖅᑐᑦ ᐊᕿᐊᑦᑐᓱᑦᓯᐊᖅᑐᑎᒃ ᐊᒻᒪᓗ ᖁᕕᐊᓱᑦᑐᑎᒃ ᐆᒻᒪᑎᒃᑯᑦ.
ᑖᒃᑯᐊ ᑕᒡᕚ ᐅᔾᔨᕐᓇᓗᐊᕐᓂᖏᑦ ᕿᑭᖅᑕᓂᒃᑯᑦ ᑲᔪᓯᑎᓯᒪᔭᖏᑦ ᐅᓪᓗᒥᒧᑦ.
ᑕᓪᓗᕈᑎᐅᑉ ᐃᒪᖓ ᐊᒻᒪᓗ ᑐᕙᐃᔪᐃᑦᑐᖅ
ᑐᓴᖅᑎᑦᓯᒍᑎᒋᓚᐅᕐᒥᔭᕗᑦ ᓴᐳᔾᔨᓯᒪᒍᑕᐅᓚᐅᐱᓪᓚᓂᐊᖅᑐᖅ ᑐᕙᐃᔪᐃᑦᑐᖅ ᑕᕆᐅᖅ ᓴᐳᔾᔭᐅᓯᒪᓂᖓᓄᑦ.
ᑕᓪᓗᕈᑎᐅᑉ ᐃᒪᖓ ᐃᓄᐃᑦ ᐊᒃᑐᖅᑕᐅᓂᖏᓐᓄᑦ ᐃᑲᔫᓯᐊᕐᓂᒧᓪᓗ ᐊᖏᖃᑎᒌᒍᑎᒃᑯᑦ ᐊᒻᒪᓗ ᑐᕙᐃᔪᐃᑦᑐᖅ ᐊᖏᖃᑎᒌᒍᑎᓂ ᑮᓇᐅᔭᖅᑖᕈᓐᓇᕐᓯᓚᐅᖅᑐᒍᑦ $251−ᒥᓕᔭᓂᒃ ᐃᑲᔫᓯᐊᓂᒃ ᐊᒻᒪᓗ ᑮᓇᐅᔭᓕᐅᕈᑎᒃᓴᖏᓐᓂᒃ ᐃᓄᐃᑦ.
ᑖᒃᑯᓇᓂ ᑮᓇᐅᔭᓕᐅᕈᑎᒃᓴᓃᖃᑕᐅᔪᑦ 30-ᐅᓗᐊᖅᑐᑦ ᐃᖅᑲᓇᐃᔮᑦᓴᑦ ᑕᓪᓕᒪᓂ ᐊᒃᑐᖅᑕᐅᓯᒪᔪᓂ ᓄᓇᓕᓐᓂ, ᐃᑉᐱᐊᕐᔪᒃ, ᑲᖏᕐᖢᒑᐱᒃ, ᐊᐅᓱᐃᑦᑐᖅ ᐊᒻᒪᓗ ᒥᑦᑎᒪᑕᓕᒃ.
ᐃᖅᑲᓇᐃᔮᓃᖃᑕᐅᓂᐊᖅᑐᑦ ᑲᔪᓯᑎᑕᐅᓗᑎᒃ ᓇᐅᑦᓯᑐᖅᑎᖁᑎᕗᑦ, ᐃᓄᐃᑦ ᓇᐅᑦᓯᑐᖅᑎᒋᕙᑦᑕᕗᑦ.
ᓇᐅᑦᓯᑐᖅᑏᑦ ᑭᓱᑐᐃᓐᓇᕐᓄᑦ−ᐊᑐᖅᑕᐅᒍᓐᓇᖅᑐᓂᒃ ᐃᓪᓗᖁᑎᖃᕐᓂᐊᖅᑐᑦ ᐊᑐᖅᑕᐅᖃᑦᑕᓂᐊᖅᑐᓂᒃ ᓂᕿᓕᕆᕕᐅᓗᑎᒃ, ᓴᓇᕖᑦ ᑐᖅᑯᐃᕕᐅᓯᓐᓈᑦ ᐱᖁᑎᒥᓄᑦ, ᐊᒻᒪᓗ ᐊᐅᓚᑦᓯᓂᕐᒥᒃ ᐱᓕᕆᐊᒥᓂᒃ.
ᓱᓕᒃᑲᓐᓂᖅ, ᑖᒃᑯᑎᒎᓇ ᐊᖏᖃᑎᒌᒍᑎᑎᒍᑦ ᑮᓇᐅᔭᓕᑕᐅᒍᓐᓇᕐᓯᒪᔪᒍᑦ ᓴᓇᔾᔪᑎᒃᓴᒥᒃ ᑐᓚᑦᑕᕐᕕᕋᓛᓂᒃ ᐊᒻᒪᓗ ᓄᓇᓕᓐᓂ ᐅᖅᑯᐃᕕᓐᓂᒃ.
ᓄᑖᓂᒃ ᑮᓇᐅᔭᖅᑖᕈᑎᒋᔪᓐᓇᓚᐅᕐᒥᔭᕗᑦ ᓴᖅᑮᓂᕐᒥᒃ ᐃᓄᐃᑦ ᓴᓇᔪᓕᓴᕐᕕᒃᓴᖓᓂᒃ ᒥᑦᑎᒪᑕᓕᒻᒥ − ᑮᓇᐅᔭᓕᑕᐅᖃᓯᐅᑎᓂᐊᖅᑐᖅ $10-ᒥᓕᔭᓂᒃ ᐋᔩᕋᕈᑕᐅᒃᑲᓂᕐᓂᖓᓄᑦ ᓄᓘᔮᓐᓂ IIBA.
ᑕᒪᓐᓇ ᐃᖅᑲᓇᐃᔮᕆᓚᐅᖅᑕᕗᑦ ᐊᑐᖅᑕᐅᓚᐅᕐᓯᒪᓐᖏᑦᑐᒥᒃ ᑲᔪᓯᑎᑦᓯᔪᖅ.
ᐊᕐᕌᒍᕋᓵᓗᓐᓂᒃ ᐱᓕᕆᐊᖑᔭᕆᐊᖃᓚᐅᖅᑐᖅ ᑎᑭᐅᑎᔪᖅ ᑕᑉᕗᖓ ᐊᒻᒪᓗ ᑕᑯᑦᑕᓯᓐᓇᓕᕈᑎᒋᔭᕗᑦ ᐊᐅᓚᔾᔭᐃᒍᑕᐅᓪᓚᑦᑖᕐᓂᐊᓕᕐᓂᖓ ᓱᖅᑯᐃᖅᑕᐅᓚᐅᖅᑐᓂᒃ ᐊᑐᓕᖁᔨᔾᔪᑎᖏᓐᓂᓪᓗ ᕿᑭᖅᑕᓂ ᓱᓕᔪᒥᒃ ᑭᒡᓕᓯᓂᐊᖅᑎᑯᑦ.
ᕿᑭᖅᑕᓂ ᓱᓕᔪᒥᒃ ᑭᒡᓕᓯᓂᐊᖅᑏᑦ
ᐊᕐᕌᒍᕋᓵᓗᓐᓂᒃ ᐱᓕᕆᐊᖑᔭᕆᐊᖃᓚᐅᖅᑐᖅ ᑎᑭᐅᑎᔪᖅ ᑕᑉᕗᖓ ᐊᒻᒪᓗ ᑕᑯᑦᑕᓯᓐᓇᓕᕈᑎᒋᔭᕗᑦ ᐊᐅᓚᔾᔭᐃᒍᑕᐅᓪᓚᑦᑖᕐᓂᐊᓕᕐᓂᖓ ᓱᖅᑯᐃᖅᑕᐅᓚᐅᖅᑐᓂᒃ ᐊᑐᓕᖁᔨᔾᔪᑎᖏᓐᓂᓪᓗ ᕿᑭᖅᑕᓂ ᓱᓕᔪᒥᒃ ᑭᒡᓕᓯᓂᐊᖅᑎᑯᑦ.
ᕿᑭᖅᑕᓂᒃᑯᑦ ᑲᔪᓯᑎᓚᐅᖅᑕᖓ ᑐᕌᒐᓕᐊᕆᒋᐊᓐᖓᕐᓯᒪᔭᕗᑦ ᑮᓇᐅᔭᓕᑕᐅᓂᕐᒥᒃ ᐱᓕᕆᐊᒃᓴᓄᑦ ᐅᓪᓗᒥ ᐊᒻᒪᓗ ᖃᐅᑎᓪᓗᒍ.
ᑎᒍᓯᓚᐅᖅᑐᒍᑦ:
- $15−ᒥᓕᔭᓂᒃ ᑐᕌᖓᔪᓂᒃ ᕿᑭᖅᑕᓂᒃᑯᑦ ᕿᑲᖅᑎᐊᖃᕐᕕᖏᓐᓄᑦ ᑮᓇᐅᔭᓂᒃ
- $2-ᒥᓕᔭᓐ ᐅᖓᑖᓃᑦᑐᓂᒃ ᐃᓄᐃᑦ ᐊᑐᕐᓯᒪᔭᖏᓐᓂᒃ ᐊᐅᓚᑦᓯᒍᑎᓂᓪᓗ ᐱᓕᕆᐊᒃᓴᑦ
- $2.9−ᒥᓕᔭᓐ ᕿᒻᒥᓕᐅᕐᓂᕐᒧᑦ ᐊᐅᓪᓚᑎᓂᒃ ᐅᑎᖅᑕᐅᕙᓪᓕᐊᒍᑎᒃᓴᑦ
- • $1.2−ᒥᓕᔭᓐ ᐅᖓᑖᓃᑦᑐᑦ ᐃᖏᕐᕋᔾᔪᑎᒃᓴᓄᑦ ᒪᒥᓴᕐᓂᒧᓪᓗ ᐃᓄᓐᓄᑦ ᐊᒃᑐᖅᑕᐅᓯᒪᔪᓄᑦ ᑕᓐᑕᔅ ᕼᐊᕙ ᓅᑕᐅᓂᒥᓂᖏᓐᓄᑦ, ᐊᒻᒪᓗ ᒪᑐᓂᖓᓄᑦ ᑭᕕᑑ, ᐹᓪᓚᑉᕕᒃ, ᐊᒻᒪᓗ ᓂᒋᐊᓂ ᓄᓇᖃᕐᕕᐅᔪᓂ ᓄᓇᓕᓐᓂ
ᓄᓘᔮᓐᓂ ᐱᓕᕆᐊᖅ
ᕿᑭᖅᑕᓂᒃᑯᑦ ᐱᓕᕆᐊᖓ ᓄᓘᔮᓐᓂ ᑕᖅᑭᐅᖅᑲᐅᔪᓂ ᑐᕌᖓᓪᓗᐊᑕᕐᓯᒪᔪᖅ ᐃᓚᒋᔭᐅᓂᑦᑎᓐᓂᒃ ᐹᕕᓐᓛᓐ ᐱᓕᕆᐊᖅ ᐊᐃᑉᐹᓂ ᐊᕙᑎᒥᒃ ᖃᐅᔨᓴᕐᓂᕐᒧᑦ ᓯᕗᓕᖅᑕᐅᓪᓗᓂ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᓐᓄᑦ (NIRB).
ᐱᒋᐊᓕᓵᕐᓂᖓᓂ ᐱᓇᓱᐊᕈᓯᑦᑕ ᑲᑎᒪᑎᑦᓯᓚᐅᖅᑐᒍᑦ ᓄᓇᓖᑦ ᑲᑎᒪᔭᖅᑐᕐᓯᒪᓪᓗᑎᒃ ᑕᓪᓕᒪᓃᓐᖔᖅᑐᑦ ᐊᒃᑐᖅᑕᐅᓯᒪᔪᓂᒃ ᓄᓇᓕᓐᓂ ᐋᔩᕋᕈᑎᖃᕆᐊᖅᑐᖅᑐᑦ ᑐᑭᒧᐊᒍᑎᒃᓴᑎᓐᓂᒃ. ᑲᑎᒪᓚᐅᖅᑐᑦ ᑭᖑᓂᐊᒍᑦ ᓄᓇᓕᓐᓃᖔᖅᑐᑦ ᑲᑎᒪᕐᔪᐊᖅᑎᑕᐅᓚᐅᖅᑎᓪᓗᒋᑦ ᐊᐅᒡᒍᓯᒥ ᑕᐃᑲᓂ ᓄᐊᓚᐅᖅᑕᕗᑦ ᐅᖃᐅᓯᒃᓴᖏᑦ ᐊᒻᒪᓗ ᓇᓗᓇᐃᖅᑐᒋᑦ ᑐᑭᒧᐊᒍᑎᒃᓴᑦ ᐅᓂᒃᑳᑎᓐᓄᑦ NIRB−ᑯᓐᓄᑦ.
NIRB−ᑯᑦ ᓈᓚᖕᓂᖃᖅᑎᑦᓯᓂᐊᖅᑐᑦ ᓅᕙᐃᒻᕙ 2019.
ᕿᑭᖅᑕᓂᒃᑯᑦ ᑐᓴᖅᑕᕗᑦ ᐱᓕᕆᐊᖓ ᐊᐅᓚᐃᓐᓇᕐᓯᒪᔪᖅ ᐃᓚᒋᔭᐅᓪᓗᑎᒃ ᑲᑎᕐᓱᐃᓂᖅ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ ᐱᓯᒪᔪᑦ ᓴᓂᕋᔭᒻᒥᒃ, ᒥᑦᑎᒪᑕᓕᒻᒥᒃ ᐊᒻᒪᓗ ᐃᒡᓗᓕᒻᒥᒃ.
ᐱᓕᕆᐊᖅ ᐱᐊᓂᒍᑎᖃᕐᓂᐊᖅᑐᖅ ᐱᖓᓱᓂᒃ ᐅᓂᒃᑳᓂᒃ, ᐊᑕᐅᓯᕐᒥᒃ ᐊᑐᓂᒃ ᓄᓇᓕᓐᓂᒃ. ᑐᓴᐅᒪᔾᔪᑎᒃᓴᑦ ᓄᐊᑕᐅᔪᑦ ᑐᕌᖓᓪᓗᐊᑕᕐᓂᐊᖅᑐᑦ ᐱᓕᕆᐊᖅ ᐊᐃᑉᐹᓂ, ᐊᒻᒪᓗ ᐱᓕᕆᐊᖅ ᐊᕙᑎᒥᒃ ᐊᒃᑐᐃᓂᖃᑐᐃᓐᓇᕆᐊᖃᕐᓂᖓᓂᒃ, ᓄᓇᒥᒃ ᐊᑐᕐᓂᕐᒥᒃ ᐊᒻᒪᓗ ᐃᓕᖅᑯᓯᕐᒨᖓᔪᓂᒃ.
ᑐᓴᐅᒪᔾᔪᑎᒃᓴᑦ ᓄᐊᑕᐅᔪᑦ ᑐᕌᖓᓪᓗᐊᑕᕐᓂᐊᖅᑐᑦ ᐱᓕᕆᐊᖅ ᐊᐃᑉᐹᓂ, ᐊᒻᒪᓗ ᐱᓕᕆᐊᖅ ᐊᕙᑎᒥᒃ ᐊᒃᑐᐃᓂᖃᑐᐃᓐᓇᕆᐊᖃᕐᓂᖓᓂᒃ, ᓄᓇᒥᒃ ᐊᑐᕐᓂᕐᒥᒃ ᐊᒻᒪᓗ ᐃᓕᖅᑯᓯᕐᒨᖓᔪᓂᒃ.
ᐱᓕᕆᐊᖅ ᐱᐊᓂᒍᑎᖃᕐᓂᐊᖅᑐᖅ ᐱᖓᓱᓂᒃ ᐅᓂᒃᑳᓂᒃ, ᐊᑕᐅᓯᕐᒥᒃ ᐊᑐᓂᒃ ᓄᓇᓕᓐᓂᒃ. ᑐᓴᐅᒪᔾᔪᑎᒃᓴᑦ ᓄᐊᑕᐅᔪᑦ ᑐᕌᖓᓪᓗᐊᑕᕐᓂᐊᖅᑐᑦ ᐱᓕᕆᐊᖅ ᐊᐃᑉᐹᓂ, ᐊᒻᒪᓗ ᐱᓕᕆᐊᖅ ᐊᕙᑎᒥᒃ ᐊᒃᑐᐃᓂᖃᑐᐃᓐᓇᕆᐊᖃᕐᓂᖓᓂᒃ, ᓄᓇᒥᒃ ᐊᑐᕐᓂᕐᒥᒃ ᐊᒻᒪᓗ ᐃᓕᖅᑯᓯᕐᒨᖓᔪᓂᒃ.
ᐳᓚᕋᖅᑐᓕᕆᓂᕐᒧᑦ ᐊᑭᓖᒍᑎᑦ
ᕿᑭᖅᑕᓂᒃᑯᑦ ᒫᓐᓇ ᑲᔪᓯᑎᑦᓯᕙᓪᓕᐊᔪᑦ ᐳᓚᕋᖅᑐᓕᕆᓂᕐᒧᑦ ᐊᐅᓚᔾᔪᑎᓄᑦ ᐊᑭᓖᒍᑎᒃᓴᓂᒃ ᐃᓯᕈᓐᓇᓂᕐᒧᑦ ᐃᓄᐃᑦ ᓄᓇᖁᑎᖏᓐᓄᑦ ᑮᓇᐅᔭᓕᐅᕋᓱᐊᖅᑎᓄᑦ ᐳᓚᕋᖅᑐᓕᕆᓂᕐᒥᒃ ᐊᐅᓚᑦᓯᔨᑎᒍᑦ.
ᑖᒃᑯᐊ ᐊᑭᓕᒍᑏᑦ ᑭᒡᒍᑕᐅᔪᑦ ᐃᓱᒫᓘᑕᐅᖃᑦᑕᕐᓯᒪᔪᓄᑦ ᐃᓄᖏᓐᓄᑦ ᕿᑭᖅᑕᓂ ᓄᓇᓕᖏᓐᓂᒃ ᐅᓄᕐᓯᕙᓪᓕᐊᑐᐃᓐᓇᕐᓂᖏᓐᓂᒃ ᑮᓇᐅᔭᓕᐅᕋᓱᐊᖅᑏᑦ ᐳᓚᕋᖅᑐᓕᕆᓂᕐᒧᑦ ᐊᐅᓚᑦᓯᔪᑦ ᓄᓇᖓᓂ, ᐱᓗᐊᖅᑐᒥ ᐳᓚᕋᑎᑕᖅᑏᑦ ᐅᒥᐊᕐᔪᐊᑦ.
ᕿᑭᖅᑕᓂᒃᑯᑦ ᐋᖅᑭᓚᐅᖅᑕᖏᑦ ᑖᒃᑯᐊ ᐳᓚᕋᖅᑐᓕᕆᓂᕐᒧᑦ ᐊᑭᖏᑦ ᐊᐅᓚᑦᓯᒍᑎᒃᓴᐅᓪᓗᑎᒃ ᑐᕋᐃᓐᓇᖅᑐᒥᒃ ᐃᑲᔫᓯᐊᒃᓴᓂᒃ ᐃᓄᓐᓄᑦ ᓄᓇᓕᓐᓂ ᐊᒃᑐᖅᑕᐅᓯᒪᔪᓄᑦ ᐳᓚᕋᖅᑐᓕᕆᓂᕐᒧᑦ.
ᕿᑭᖅᑕᓂ ᓄᓇᖓᓂ ᐊᒥᓲᓂᕐᐹᓄᑦ ᐳᓚᕋᑎᑕᖅᑎᓄᑦ ᐅᒥᐊᕐᔪᐊᓄᑦ ᑎᑭᑕᐅᖃᑦᑕᖅᑐᖅ ᓄᓇᕗᒻᒥ.
ᐃᒪᐃᖃᑦᑕᒪᓪᓕ, ᐳᓚᕋᖅᑐᓕᕆᓂᕐᒥᒃ ᐊᐅᓚᑦᓯᔪᑦ ᐃᓵᑦᓯᖃᑦᑕᖏᑦᑐᑦ ᐅᔾᔨᓇᖅᑐᒥᒃ ᑐᕋᐃᓐᓇᖅᑐᒥᒃ ᐃᑲᔫᓯᐊᓂᒃ ᓄᓇᓕᓐᓄᑦ.
50% ᑖᒃᑯᓇᓐᖓᑦ ᐊᑭᓕᐅᑎᓂᒃ ᓄᓇᓕᓐᓂ ᐊᖑᓇᓱᑦᑐᓕᕆᔨᒃᑯᑦ ᑲᑐᔾᔨᖃᑎᒌᖏᓐᓅᖃᑦᑕᓂᐊᖅᑐᑦ ᓄᓇᓕᓐᓂ ᐊᒃᑐᐊᔪᓂ ᐃᓄᐃᑦ ᓄᓇᖁᑎᖏᓐᓄᑦ (IOL) ᐊᑐᖅᑕᐅᖃᑦᑕᖅᑐᓂ.
ᐳᓚᕋᖅᑐᓕᕆᓂᕐᒧᑦ ᐊᐅᓚᑦᓯᔨᐅᔪᑦ ᖃᐅᔨᒃᑲᐃᔾᔪᑎᑖᖅᑎᑕᐅᓂᐊᖅᑐᑦ ᓄᑖᒥᒃ ᐊᑭᓕᐅᑎᒃᓴᒥᒃ ᐊᒃᑐᐊᔪᓂᒃ ᐊᐅᓚᑦᓯᓂᖏᓐᓂᒃ ᐳᓚᕋᖅᑐᓕᕆᓂᕐᒥᒃ ᐊᐅᓚᑕᐅᔪᓂᒃ ᐃᓄᐃᑦ ᓄᓇᖁᑎᖏᓐᓂ ᑐᒃᓯᕋᐅᓯᐅᕋᐃᑉᐸᑕ ᐃᓯᕈᒪᓂᕐᒧᑦ ᑕᒪᒃᑯᓄᖓ.
SEA ᐅᖅᓱᐊᓗᓐᓂᐊᕐᓂᖅ ᒑᓯᒥᓪᓗ ᑕᓪᓗᕈᑎᐅᑉ ᐃᒪᖓᓂ ᐊᒻᒪᓗ ᐊᑯᑭᑦᑐᑦ/ᕿᑭᖅᑖᓗᒃ ᐃᑭᖓᓂ
ᐃᓂᖅᓯᒪᔪᑦ NIRB ᐅᓂᒃᑳᖏᑦ ᓴᖅᑭᖅᑕᐅᓚᐅᖅᑐᑦ ᐱᒋᐊᓕᓵᕐᓂᖓᓂ ᐊᐅᒡᒍᓯ ᐊᑐᓕᖁᔨᔾᔪᑎᖃᖅᑐᓂ ᑐᑭᒧᐊᒍᑎᒃᓴᓂᒃ ᐊᕙᑎᒥᒃ ᖃᐅᔨᓴᕐᓂᕐᒧᑦ ᐅᖅᓱᐊᓗᓐᓂᐊᓂᕐᒥᒃ ᒑᓯᒥᓪᓗ ᑕᓪᓗᕈᑎᐅᑉ ᐃᒪᖓᓂ ᐊᒻᒪᓗ ᐊᑯᑭᑦᑐᑦ/ᕿᑭᖅᑖᓗᒃ ᐃᑭᖓᓂ.
ᕿᑭᖅᑕᓂᒃᑯᑦ ᑐᓂᓯᓚᐅᖅᑐᑦ IQ ᐅᓂᒃᑳᓂᒃ NIRB−ᑯᓐᓄᑦ ᑭᖑᓪᓕᕐᐹᒥ ᓈᓚᑦᑎᑦᓯᓂᖏᓐᓂᒃ ᐊᒻᒪᓗ ᐊᒥᓲᓂᕐᓴᑦ 80−ᓂ ᐊᑐᓕᖁᔨᔾᔪᑎᓂ ᐋᖅᑭᑦᓱᓚᐅᖅᑕᑎᓐᓂ ᐃᓱᒪᕐᓴᕐᓯᐅᕈᑕᐅᓯᒪᓕᓚᐅᖅᑐᑦ NIRB−ᑯᑦ ᑭᖑᓪᓕᕐᐹᒥ ᐅᓂᒃᑳᖏᓐᓂ ᒥᓂᔅᑕᒧᑦ.
CIRNAC ᒥᓂᔅᑕᖓ (ᑯᐃᓐ−ᓄᓇᖃᖅᑳᕐᓯᒪᔪᑦ ᐱᓕᕆᖃᑎᒌᓐᓂᕐᒧᑦ ᐊᒻᒪᓗ ᐅᑭᐅᖅᑕᖅᑐᒨᖓᔪᑦ ᑲᓇᑕᒥ) ᐊᑐᕐᓂᐊᖅᑐᑦ ᑖᑦᓱᒥᖓ ᐅᓂᒃᑳᒥᒃ ᐃᓱᒪᓕᐅᕈᑎᖃᕐᓗᑎᒃ ᑲᔪᓯᑎᑕᐅᒋᐊᕋᔭᕐᒪᖔᖅ ᐋᒡᒐᓘᓐᓃᑦ ᓄᖅᑲᖓᑎᑕᐅᔪᖅ ᐅᖅᓱᐊᓗᓐᓂᐊᕐᓂᖅ ᒑᓯᒥᓪᓗ ᓴᓐᓂᕈᑎᐅᑉ ᐃᒪᖓᓂ, ᐃᓱᓕᑉᕕᒃᓴᓕᒃ ᐊᕐᕌᒎᓂᐊᖅᑐᖅ.
ᒥᓂᔅᑕ ᐃᓱᒪᓕᐅᕈᑎᒋᔭᖓᒍᑦ NIRB ᐊᑐᓕᖁᔨᔾᔪᑎᖓᓂᒃ ᓄᖅᑲᖓᑎᑦᓯᓂᖅ ᐋᖅᑭᑦᓯᒪᐃᓐᓇᓂᐊᖅᑐᖅ ᑕᓪᓕᒪᒃᑲᓂᕐᓂᒃ ᖁᓂᓄᑦ ᐊᕐᕌᒍᓄᑦ ᑎᑭᓪᓗᒍ.
ᕿᑭᖅᑕᓂ ᐃᓕᓐᓂᐊᑲᓐᓂᖅᑐᓄᑦ ᐃᑲᔫᑎᒃᓴᖏᑦ
80 ᕿᑭᖅᑕᓂᒃᑯᑦ ᐃᓕᓐᓂᐊᑲᓐᓂᖅᑐᓄᑦ ᐃᑲᔫᑎᒃᓴᓂᒃ $2,500/ᐊᕐᕌᒍᒥ, ᑐᓂᔭᐅᖃᑦᑕᖅᑐᑦ ᓯᕗᓪᓕᕐᐹᑐᐃᓐᓇᕐᓄᑦ ᑐᒃᓯᕋᐅᓯᐅᖅᑐᓄᑦ ᐃᓕᓐᓂᐊᖅᑎᓄᑦ ᕿᑭᖅᑕᓂ ᓄᓇᖓᓂ ᐃᓕᓐᓂᐊᑲᓐᓂᖅᑐᓄᑦ.
ᐄᒪᓕ ᖄᐱᒃ ᐃᑲᔫᓯᐊᖅᑖᖅᑐᖅ $5,000 ᔮᓐ ᐊᒪᕈᐊᓕᒃ ᐃᓕᓐᓂᐊᑲᓐᓂᖅᑐᓄᑦ ᐃᑲᔫᑎᒃᓴᒥᒃ ᓴᖅᑭᖅᑕᐅᓯᒪᔪᖅ ᐅᐱᒋᔭᐅᓪᓗᓂ ᔮᓐ ᐊᒪᕈᐊᓕᒃ ᐱᓇᓱᐊᖃᑦᑕᕐᓯᒪᓂᖓᓄᑦ ᐃᓅᓯᖃᑦᓯᐊᑲᓐᓂᖁᓪᓗᒋᑦ ᐃᓄᐃᑦ ᓄᓇᕗᒻᒥ.
ᐃᓕᓐᓂᐊᖅᑎᓂᒃ ᑭᐅᔭᐅᖃᑦᑕᓚᐅᖅᑐᒍᑦ ᒪᑭᒋᐊᒃᑲᓂᕐᓇᖅᑐᓂᒃ ᐱᕚᓪᓕᕈᑕᐅᓯᒪᓂᖏᓐᓂᒃ ᑕᒃᑯᐊ ᐃᓕᓐᓂᐊᑲᓐᓂᖅᑐᓄᑦ ᐃᑲᔫᑏᑦ.
ᒥᑭᓂᖏᓐᓂ ᓄᑕᖅᑲᑦ ᐃᓕᓐᓂᐊᓵᓕᓂᖏᓐᓄᑦ ᐊᑐᕋᑦᓴᑦ
ᐊᕐᕌᓂᓂᒃ ᑐᓂᓯᖃᑦᑕᕐᓯᒪᓕᖅᑐᒍᑦ ᓄᑖᓂᒃ ᐃᓄᒃᑎᑑᖅᑐᓂᒃ ᐃᓚᒌᓄᑦ ᑎᑎᖅᑭᕆᒍᑎᒃᓴᓂᒃ.
ᐱᓇᓱᐊᖃᑎᒋᒍᓐᓇᓚᐅᖅᑕᕗᑦ ᓄᓇᕗᑦ ᒐᕙᒪᒃᑯᖏᓐᓂ ᐃᓕᓐᓂᐊᕐᓂᓕᕆᔨᒃᑯᑦ ᐊᒻᒪᓗ ᑐᓂᐅᖅᑲᐃᓪᓗᑕ ᑖᒃᑯᓂᖓ ᐴᖅᑲᕐᓯᒪᔪᓂᒃ 55-ᓄᑦ ᓚᐃᓴᖃᖅᑐᓄᑦ ᓄᑕᖅᑲᓂᒃ ᐸᖅᑭᕕᓐᓂ ᓄᓇᕗᓕᒫᒥ.
ᐃᓚᒌᓄᑦ ᑎᑎᖅᑭᕆᔾᔪᑎᒃᓴᑦ ᑐᕌᖓᔪᑦ ᑲᔪᖏᕐᓴᐃᓂᕐᒧᑦ ᐃᓄᒃᑎᑑᕆᐊᒃᑲᓐᓂᖃᑦᑕᖁᔨᓂᕐᒥᒃ ᐊᖏᕐᕋᓂ.
ᐴᖅᑲᖅᑕᐅᓯᒪᔪᑦ ᐃᓚᒌᓄᑦ ᑎᑎᖅᑭᕆᔾᔪᑎᒃᓴᓃᖃᑕᐅᔪᑦ ᐅᖃᓕᒫᒐᕋᓛᑦ ᐃᓕᓴᒍᑏᑦ, ᐅᖃᕆᐅᕐᓴᐅᑏᑦ, ᕿᓪᓕᖅᑐᑦ ᐃᓄᒃᑎᑑᖅᑐᑦ ᓄᑕᖅᑲᓄᑦ ᐃᓐᖏᐅᓰᑦ ᐅᖃᓕᒫᒐᓪᓗ.
ᐃᓄᒃᑦᑐᑦ ᐃᓚᒌᓄᑦ ᑎᑎᖅᑭᕆᔾᔪᑎᒃᓴᑦ ᑕᑉᕙᓐᖔᕐᓯᒪᖃᑕᐅᔪᑦ ᐃᐱᑎᑭ ᐱᓕᕆᐊᓂᒃ ᐃᓕᓐᓂᐊᕈᑎᒃᓴᓄᑦ ᑮᓇᐅᔭᓕᑕᐅᓯᒪᒍᑕᐅᔪᓂᒃ ᒪᑭᒋᐊᖅᑕ ᐃᓄᐃᑦ ᐱᓕᒻᒪᓴᕐᓂᕐᒧᑦ ᑯᐊᐳᕇᓴᒃᑯᓐᓂᒃ. ᐅᓄᖅᑐᑦ ᐊᑐᕋᑦᓴᑦ ᐴᖅᑲᖅᑕᐅᓯᒪᔪᑦ ᐋᖅᑭᓱᖅᑕᐅᓚᐅᕐᒥᔪᑦ ᑕᑉᕙᖔᕐᓱᑎᒃ ᕿᑭᖅᑕᓂᒃᑯᑦ ᐃᑲᔫᑎᒃᓴᓄᑦ ᑮᓇᐅᔭᖏᓐᓂᒃ.
ᕿᑭᖅᑕᓂᒃᑯᑦ ᐊᕐᕌᒍᑕᒫᕐᓯᐅᑦ ᐅᓂᒃᑳᖓ
2018-2019 ᕿᑭᖅᑕᓂᒃᑯᑦ ᐊᕐᕌᒍᑕᒫᕐᓯᐅᑦ ᐅᓂᒃᑳᖓ ᒫᓐᓇ ᐊᑐᐃᓐᓇᐅᓕᖅᑐᖅ.
ᐅᓂᒃᑳᑦ ᓄᑖᒥᒃ ᑕᐅᑦᑐᓖᑦ ᐊᒻᒪᓗ ᓴᖅᑭᔮᖅᑎᑦᓯᔪᑦ ᐅᔾᔨᕐᓇᓗᐊᕐᓂᖏᓐᓂᒃ ᐱᓕᕆᐊᕆᖃᑦᑕᓚᐅᖅᑕᑎᓐᓂᒃ ᐊᕐᕌᓂᓂᒃ ᓇᐃᓈᕐᓯᒪᓪᓗᑎᒃ ᐅᓂᒃᑳᖑᓂᖏᑦ ᐊᒻᒪᓗ ᕿᒥᕐᕈᐊᒍᒥᓇᕐᓱᑎᒃ ᐊᔾᔨᓕᐅᒐᑦ.
ᑲᔪᖏᕐᓴᐅᑕᐅᒃᑲᓂᖅᑐᖅ ᐅᖃᓕᒫᖃᑦᑕᖅᑐᓄᑦ ᑕᑯᒋᐊᖃᑦᑕᓂᕐᒥᒃ ᐃᑭᐊᖅᑭᕕᑦᑎᓐᓂᒃ ᐅᖃᓕᒫᕐᓗᑎᒃ ᐊᓯᓕᒫᖏᓐᓂᒃ ᑎᑎᕋᕐᓯᒪᔪᓂᒃ ᓴᖅᑭᖃᑦᑕᓚᐅᖅᑕᑎᓐᓂᒃ ᐊᕐᕌᒍᑦᑎᓐᓂ ᑐᓴᐅᒪᖁᓪᓗᒋᑦ ᑐᑭᓯᖁᓪᓗᒋᓪᓗ ᐃᓄᐃᑦ ᐱᓕᕆᐊᕆᖃᑦᑕᑕᑦᑎᓐᓂᒃ.
ᐃᑲᔫᑎᒃᓴᓄᑦ ᓴᓂᕐᕚᕆᕕᒻᒧᓪᓗ ᐅᓂᒃᑳᑦ
ᑖᒃᑯᐊ 2018-2019 ᐃᑲᔫᑎᒃᓴᓄᑦ ᓴᓂᕐᕚᕆᕕᒻᒧᓪᓗ ᐊᕐᕌᒍᑕᒫᕐᓯᐅᑏᑦ ᐅᓂᒃᑳᑦ ᐊᑐᐃᓐᓇᐅᓕᕐᒥᔪᑦ.
ᐊᐃᑉᐸᕆᖠᖅᑕᖓ ᓴᖅᑭᖅᑕᕗᑦ ᑎᑎᕋᕐᓯᒪᔪᑦ ᐊᕐᕌᒍᑕᒫᕐᓯᐅᑏᑦ ᐅᓂᒃᑳᑦ.
ᑭᓯᐊᓂ, ᐊᕐᕌᒍᑦᑎᓐᓂ ᐅᖃᓕᒫᒃᑲᓐᓂᕈᓐᓇᖅᑕᑎᑦ ᑐᓴᐅᒪᑎᑦᓯᔾᔪᑏᑦ ᓄᑖᑦ ᐃᑲᔫᑎᒃᓴᖁᑎᕗᑦ ᑮᓇᐅᔭᑦ ᐱᓕᕆᐊᒃᓴᓄᑦ, ᐃᓚᒋᔭᐅᓪᓗᑎᒃ ᐸᐃᕆᕕᓐᓄᑦ ᐊᑐᕋᑦᓴᑦ ᐊᒻᒪᓗ QCAP ᑖᒃᑯᐊ ᕿᑭᖅᑕᓂ ᓄᓇᓕᓐᓂ ᐊᐅᓚᑕᐅᔪᓄᑦ ᐱᓕᕆᔾᔪᑎᒃᓴᑦ.
2019 ᐅᑭᐊᑦᓵᖓᓂ ᐱᕙᓪᓕᐊᔪᑦ ᑐᓴᕋᑦᓴᑦ
ᕿᑭᖅᑕᓂᒃᑯᑦ ᐅᑭᐊᑦᓵᖓᓂ 2019 ᐱᕙᓪᓕᐊᔪᓂᒃ ᑐᓴᕋᑦᓴᑦ, ᐊᑐᐃᓐᓇᐅᓕᖅᑐᑦ ᑎᑎᕋᕐᓯᒪᔪᒃᑯᑦ ᐊᒻᒪᓗ ᖃᕆᓴᐅᔭᒃᑯᑦ. ᑕᐅᑦᑐᖓ ᐋᖅᑭᒋᐊᓚᐅᖅᑕᕗᑦ ᑐᓴᕋᔅᓴᑦ ᑕᑯᒥᓇᓕᖅᑎᑕᐅᓪᓗᓂ ᐊᒻᒪᓗ ᓄᑖᖑᓪᓗᑎᒃ ᑕᐅᑦᑐᖏᑦ. ᑖᓐᓇ ᓯᕗᓪᓕᐹᑦᓯᐊᖅ ᕿᑭᖅᑕᓂᒃᑯᑦ ᐱᕙᓪᓕᐊᔪᖁᑎᖏᓐᓂᒃ ᑐᓴᕋᑦᓴᑦ ᑕᑯᑦᓴᐅᑎᑦᓯᔪᖅ ᓇᓗᓇᐃᔭᕐᓯᒪᔪᓂᒃ ᐃᓄᓐᓂᒃ ᐱᓕᕆᓯᐊᑐᒻᒪᕆᐅᖃᑦᑕᖅᑐᓂᒃ ᕿᑭᖅᑕᓂ ᓄᓇᖓᓂ.
