ᓄᓇᓕᓐᓂᑦ ᓇᐅᑦᑎᕐᓱᖅᑏᑦ ᒥᑦᑎᒪᑕᓕᒻᒥᐅᓪᓗ ᐃᓚᒋᔭᐅᔪᔪᑦ ᐊᕙᑎᑦᑎᓐᓂ ᐋᓐᓂᖅᑐᓕᕆᓂᕐᒥᒃ ᐃᓕᓐᓂᐊᓂᕐᒥᒃ ᔪᓚᐃ 30ᒥ ᐋᒡᒌᓯ 1ᒧᑦ. ᑕᕝᕙᓂ ᐃᓕᓐᓂᐊᓂᕐᒥ ᖃᐅᔨᒪᒋᐊᒃᑲᓐᓂᕈᑕᐅᔪᔪᖅ ᐊᑦᑕᓇᖅᑐᒦᑦᑕᐃᓕᓂᕐᒥᒃ ᐊᒻᒪᓗ ᐃᓅᓯᖏᓐᓂᒃ ᐊᐅᓪᓚᐸᑦᑐᑦ ᐊᒻᒪᓗᑦᑕᐅᖅ ᐃᓕᒃᑲᓐᓂᖁᓪᓗᒋᑦ ᐊᒻᒪᓗ ᐱᓕᕆᔪᓐᓇᓯᒃᑲᓐᓂᖁᓪᓗᒋᑦ ᓄᓇᓖᑦ.

ᐃᓕᓐᓂᐊᕐᓂᖃᓯᔪᔪᑦ ᑐᔅᓯᕋᐅᓯᐅᖁᔨᔾᔪᑎᖃᓚᐅᖅᑎᓪᓗᒋᑦ ᒥᑦᑎᒪᑕᓕᒻᒥᐅᓂᑦ ᓇᐅᑦᑎᕐᓱᖃᑦᑕᓂᕐᒧᑦ ᐱᓕᕆᐊᕐᒧᑦ. ᕿᑭᖅᑕᓂᒃᑯᑦ ᐃᖅᑲᓇᐃᔭᖅᑎᑦᑎᓯᔪᒻᒪᑕ ᐱᖓᓱᓂᑦ ᓇᐅᑦᑎᕐᓱᖅᑎᐅᔪᔪᓂᑦ ᐅᑎᖅᑐᓂᑦ ᐊᒻᒪᓗ ᐱᖓᓱᓂᑦ ᓇᐅᑦᑎᓱᖅᑎᑖᖅᑲᐅᓂᑦ ᑕᕝᕙᓂ ᐱᓕᕆᐊᕐᒥ ᑕᒫᓂ ᐃᒪᐅᓂᖓᓂ, ᐃᓘᓐᓇᑎᒃ ᒥᑦᑎᒪᑕᓕᒻᒥᐅᑕᐅᓪᓗᑎᒃ. ᓇᐅᑦᑎᕐᓱᖅᑎᕗᑦ ᖃᐅᔨᒪᑦᑎᐊᕋᓗᐊᖅᑎᓪᓗᒋᑦ ᐊᖑᓇᓱᖃᑦᑕᓂᕐᒥᒃ ᐊᐅᓪᓚᕐᓯᒪᖃᑦᑕᓂᕐᒥᓪᓗ, ᐃᓕᓐᓂᐊᐸᓪᓕᐊᒻᒪᑕ ᓄᑖᓂᑦ ᐃᓕᓯᒪᓂᐊᖅᑕᖏᓐᓂᒃ ᓇᐅᑦᑎᕐᓱᖃᑦᑕᓂᕐᒨᖓᔪᓂᑦ. ᐆᑦᑑᑎᒋᓗᒍ, ᓇᐅᑦᑎᓱᖅᑏᑦ ᓂᕐᔪᑎᓂᑦ ᖃᐅᔨᓴᖃᑦᑕᖅᑐᑦ ᐊᒻᒪᓗᑦᑕᐅᖅ ᐊᓯᖏᓐᓂᒃ ᑲᒪᒋᔭᔅᓴᖃᖃᑦᑕᕆᓪᓗᑎᒃ ᐃᖅᑲᓇᐃᔮᔅᓴᖃᕐᐸᑦᑐᑎᓪᓗ.

ᕿᑭᖅᑕᓂᒃᑯᑦ ᓱᓕ ᐃᓕᓐᓂᐊᑎᑦᑎᖃᑦᑕᓂᐊᖅᑐᑦ ᐋᖅᑭᔅᓱᐃᕙᓪᓕᐊᑦᑎᐊᕈᒪᓪᓗᑎᒃ ᓇᐅᑦᑎᕐᓱᖃᑦᑕᓂᕐᒥᒃ ᐱᓕᕆᐊᕐᒥ ᒥᑦᑎᒪᑕᓕᐅᒻᒥᐅᓂᑦ. ᐃᓚᒋᔭᐅᓪᓗᓂ ᐃᓕᓐᓂᐊᓂᕐᒧᑦ ᐱᔭᕇᕋᑖᓚᐅᖅᑕᑎᓐᓄᑦ, ᐸᕐᓇᑦᑐᒍᑦ ᓇᐅᑦᑎᕐᓱᖅᑎᐅᖃᑎᒌᓂᑦ ᐃᓕᓐᓂᐊᑎᑦᑎᓛᕆᐊᔅᓴᖅ ᐃᖅᑲᓇᐃᔮᖃᓕᓂᐅᓕᖅᑐᑦ ᓇᐅᑦᑎᓱᖅᑏᑦ ᐃᖅᑲᓇᐃᔭᖃᑎᖃᓕᖅᑲᑕ ᓇᐅᑦᑎᓱᖅᑎᑖᖅᑲᐅᓂᑦ ᐃᓕᑉᐸᓪᓕᖁᓪᓗᒋᑦ.

ᐃᓕᓐᓂᐊᑲᓐᓂᓛᕐᒥᔪᑦ ᐅᑭᐊᔅᓵᖑᓕᖅᑲᑦ, ᖃᐅᔨᒋᐊᖃᑦᑕᕆᔅᓯ ᖃᕋᓴᐅᔭᒃᑯᑦ ᐃᑭᐊᖅᑭᕕᑦᑎᓐᓂᒃ ᐊᒻᒪᓗ ᐃᓄᓕᒫᓄᑦ ᑐᓴᐅᒪᑎᑦᑎᕕᑦᑎᓐᓄᑦ ᑐᑭᓯᒃᑲᓐᓂᖃᑦᑕᕐᓂᐊᕋᔅᓯ.