2018-2019 ᕿᑭᖅᑕᓂᒃᑯᑦ ᐊᕐᕌᒎᑕᒫᕐᓯᐅᑏᑦ ᐅᓂᒃᑳᖏᑦ ᓄᑖᒥᒃ ᑕᐅᑦᑐᓖᑦ ᐊᒻᒪᓗ ᓴᖅᑭᔮᖅᑎᑦᓯᔪᑦ ᐅᔾᔨᕐᓇᓗᐊᕐᓂᖏᓐᓂᒃ ᐱᓕᕆᐊᕆᖃᑦᑕᓚᐅᖅᑕᑎᓐᓂᒃ ᐊᕐᕌᓂᓂᒃ.

ᑕᑯᒋᐊᒃᑭᑦ ᐅᓂᒃᑳᑦ ᐊᒻᒪᓗ ᖃᐅᔨᓂᐊᖅᑕᑎᑦ ᑲᔪᓯᐊᑎᖃᑦᑕᕐᓯᒪᔭᕗᑦ ᕿᒥᕐᕈᐊᕈᒥᓇᖅᑐᓂ ᐅᓂᒃᑳᑎᓐᓂᒃ, ᕿᒥᕐᕈᐊᕈᒥᓇᖅᑐᓂᒃ ᐊᔾᔨᓂᒃ ᐊᒻᒪᓗ ᓴᓇᑐᔪᒥᒃ ᑕᐅᑦᑐᓕᓐᓂᒃ.

ᐊᕐᕌᒍᑕᒫᕐᓯᐅᑏᑦ ᐅᓂᒃᑳᑦ ᐃᓄᓐᓄᑦ ᑕᑯᒋᐊᕈᑎᒃᓴᐅᔪᑦ ᑎᑎᕋᖃᑦᑕᕐᓯᒪᔭᓕᒫᑦᑎᓐᓂᒃ ᐊᕐᕌᓂᓂᒃ ᐊᒻᒪᓗ ᓇᑭᑦ ᐱᓯᒪᒻᒪᖔᑦᑎᒍ ᑎᑎᕋᖅᑕᐅᒋᐊᓐᖓᕐᓯᒪᔪᑦ ᓇᓗᓇᐃᕐᓯᒪᓪᓗᑎᒃ ᐃᑭᐊᖅᑭᕕᑦᑎᓃᑦᑐᓂᒃ.

ᐊᕐᕌᒍᖃᑦᓯᐊᑐᒻᒪᕆᐅᓯᒪᔪᑦ ᕿᑭᖅᑕᓂᒃᑯᑦ! ᐅᔾᔨᕐᓇᓗᐊᕐᓂᖏᑦ ᐊᐅᓚᓂᕆᔭᐅᖃᑦᑕᕐᓯᒪᔪᑦ ᐃᓚᒋᔭᐅᓪᓗᑎᒃ:

• ᐃᓂᖅᑕᐅᓂᖏᑦ ᑕᓪᓗᕈᑎᐅᑉ ᐃᒪᖓᓄᑦ IIBA ᐊᒻᒪᓗ ᐋᔩᕋᕈᑕᐅᔪᑦ ᐊᑐᖅᑕᐅᓚᐅᐱᓪᓚᓂᐊᖅᑐᑦ ᓴᐳᔾᔨᓯᒪᒍᑕᐅᔪᑦ ᑐᕙᐃᔪᐃᑦᑐᖅ ᑕᕆᐅᖅ ᓴᐳᔾᔭᐅᓯᒪᓂᖓᓄᑦ
• ᐋᔩᕋᕈᑕᐅᓯᒪᓂᖏᑦ $251-ᒥᓕᔭᓐ ᐅᖓᑖᓃᑦᑐᓂᒃ ᑮᓇᐅᔭᓕᐅᕈᑎᒃᓴᖏᓐᓄᑦ ᐃᑲᔫᓯᐊᒃᓴᖏᓐᓄᓪᓗ ᐃᓄᐃᑦ ᖁᑦᑎᑦᑐᒥᐅᑦ, ᐃᓚᒋᔭᐅᓪᓗᑎᒃ ᐃᖅᑲᓇᐃᔮᑦ ᐊᒻᒪᓗ ᑕᕆᐅᒃᑯᑦ ᐱᖁᑎᕐᔪᐊᑦ
• ᒪᒥᐊᑉᕕᐅᓂᖅ ᑲᓇᑕ ᒐᕙᒪᒃᑯᖏᓐᓂᒃ ᐊᒻᒪᓗ ᖃᐅᔨᕐᕙᓚᓐᓂᖏᑦ ᖃᐅᔨᔭᐅᓚᐅᖅᑐᑦ ᕿᑭᖅᑕᓂ ᓱᓕᔪᒥᒃ ᑭᒡᓕᓯᓂᐊᖅᑎᓄᑦ
• ᑮᓇᐅᔭᓕᐅᕋᓱᐊᕈᑎᒃᓴᑖᕆᐊᓐᖓᕈᑏᑦ $15-ᒥᓕᔭᓂᒃ ᓴᓂᕐᕚᕆᕕᑦᑎᓐᓄᑦ ᐊᒻᒪᓗ $5-ᒥᓕᔭᓐ ᐃᓕᖅᑯᓯᓕᕆᓂᕐᒧᑦ ᒪᒥᓴᖅᑐᓕᕆᓂᕐᒧᓪᓗ
• ᐋᖅᑭᒋᐊᕈᑏᑦ ᓄᓘᔮᓐᓂ IIBA ᐊᒻᒪᓗ ᑮᓇᐅᔭᓕᑕᐅᒋᐊᒃᑲᓐᓂᕈᑏᑦ ᐃᓄᐃᑦ ᐱᓕᖕᒪᓴᕐᓂᖏᓐᓄᑦ, ᐃᓚᒋᔭᐅᓪᓗᑎᒃ $10-ᒥᓕᔭᓐ ᑐᕌᖓᔪᑦ ᐃᓄᐃᑦ ᓴᓇᑐᓕᕐᐸᓕᕐᕕᑦᓴᖓᓂᒃ ᒥᑦᑎᒪᑕᓕᒻᒥ
• ᑕᑯᒋᐊᒃᑲᓂᕐᓂᖅ ᐅᓄᕐᓂᕐᓴᓂᒃ ᐃᓄᓐᓂᒃ ᐃᓕᓐᓂᐊᕌᓂᑦᑐᓂᒃ ᕿᑭᖅᑕᓂ ᐊᔪᕈᓐᓃᓴᕐᓂᕐᒧᑦ ᐱᓕᒻᒪᓴᕐᓂᒧᓪᓗ ᐃᖅᑲᓇᐃᔭᖃᑎᒌᓐᓂᒃᑯᑦ (Q-STEP) ᐃᖅᑲᓇᐃᔮᖅᑖᑦᓯᐊᕙᓪᓗᓂᓗ
• ᐱᐊᓂᖕᓂᕗᑦ ᓯᕗᓪᓕᕐᐹᒥ ᐊᕐᕌᒍᓕᒫᖅ ᓄᑖᓂ ᐃᑲᔫᑎᒃᓴᓂ ᑮᓇᐅᔭᓂ ᐱᓕᕆᐊᒃᓴᑦ ᐊᒻᒪᓗ ᑕᑯᓂᕗᑦ ᐸᐃᕆᕕᓐᓂ ᐊᑭᑭᓪᓕᒋᐊᕈᑎᒃᓴᓂ ᐱᓕᕆᐊᖑᑎᓪᓗᒍ, ᐊᒻᒪᓗ ᓄᑕᖅᑲᑦ ᒥᑭᓂᖏᓐᓂ ᐃᓕᓐᓂᐊᕈᑎᒃᓴᑦ

ᐅᑎᒧᑦ ᑕᑯᒋᐊᕐᓂᖅ, 2018-19 ᕿᑭᖅᑕᓂᒃᑯᓐᓄᑦ ᐊᕐᕌᒍᑦᓯᐊᕙᒻᒪᕆᐅᓯᒪᔪᖅ.

ᐃᖅᑲᓇᐃᔭᖅᑎᕗᑦ ᑲᑎᒪᔨᖁᑎᕗᓪᓗ ᑲᔪᓯᐊᑎᑦᓯᖃᑦᑕᕐᓯᒪᔪᑦ ᐱᐅᔪᕐᔪᐊᓂᒃ ᐱᓕᕆᐊᓂᒃ ᐱᓕᕆᐊᒃᓴᑦᑎᓐᓂ ᐊᒻᒪᓗ ᐱᓇᓱᐊᒐᑦᓴᓂᒃ ᐱᔨᑦᓯᕈᑎᒃᓴᓄᑦ ᕿᑭᖅᑕᓂ ᐃᓄᓐᓄᑦ. ᑕᑯᓵᕈᒪᒻᒪᕆᓕᖅᑕᕗᑦ ᖃᓄᐃᓐᓂᐊᕐᒪᖔᕐᓕ ᑲᔪᓯᐊᑎᑕᐅᓂᐊᖅᑐᑦ ᐊᕐᕌᒎᓂᐊᖅᑐᒥ!