ᐃᖃᓗᐃᑦ, ᓄᓇᕗᑦ − ᐊᒃᑑᕝᕙ 10, 2019 – ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᖁᕕᐊᓱᑉᐳᑦ ᑐᓴᖅᑎᑦᑎᔭᕆᐊᒃᓴᖅ ᓄᓇᓕᖕᓄᑦ ᓂᐅᕐᕈᖃᑦᑕᒃᑲᓐᓂᓛᕐᓂᖏᖕᓂᒃ ᑕᓪᓕᒪᓄᑦ ᕼᐊᒻᓚᐅᔪᓄᑦ ᐊᑦᑐᖅᑕᐅᓂᖃᕋᔭᖅᑐᑦ ᑕᓪᓗᕈᑎᐅᑉ ᐃᒪᖓᑕ ᐃᓄᐃᑦ ᐊᑦᑐᖅᑕᐅᓂᖏᖕᓄᑦ ᐊᒻᒪᓗ ᐱᕚᓪᓕᕈᑎᒃᓴᖏᖕᓄᑦ ᐊᖏᕈᑎᒥ ᐊᒻᒪᓗ ᑐᕙᐃᔪᐃᑦᑐᑉ ᐱᓪᓗᒍ ᐊᖏᕈᑎᖏᑦ ᐅᖃᐅᑕᐅᔭᖅᑐᕐᓗᑎᑦ.

ᓄᓇᓕᒻᒥᐅᑦ ᑲᑎᒪᑎᑕᐅᓛᖅᑐᑦ ᐅᑯᓇᓂ ᓄᓇᓕᐅᔪᓂ ᐃᒃᐱᐊᕐᔪᒃ, ᑲᖏᖅᑐᒑᐱᒃ, ᐊᐅᓱᐃᑦᑐᖅ, ᒥᑦᑎᒪᑕᓕᒃ ᐊᒻᒪᓗ ᖃᐅᓱᐃᑦᑐᖅ. ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑕ ᐃᖅᑲᓇᐃᔭᖅᑎᖏᑦ ᑐᑭᓯᒋᐊᖅᑎᑦᑎᓛᖅᑐᑦ ᐅᖓᑖᓃᑦᑐᓄᑦ $250 ᒥᓕᐊᓐ ᐋᔩᕋᕈᑎᒋᔭᐅᓯᒪᔪᑦ ᐃᑲᔫᑎᒃᓴᑦ ᐃᓄᖕᓄᑦ ᖁᑦᑎᒃᑐᒥᐅᑕᕐᓄᑦ.

“ᐅᐱᒍᓱᑦᑐᒻᒪᕆᐅᕗᑦ ᑮᓇᐅᔭᓂᑦ ᐊᑐᖅᑐᖃᓛᕐᓂᖓᓂᒃ ᐋᔩᕋᕈᑎᒋᓚᐅᖅᑐᑎᒍᑦ ᐃᓄᖕᓄᑦ ᖁᑦᑎᒃᑐᒥᐅᑕᓄᑦ ᑕᓪᓗᕈᑎᐅᑉ ᐃᒪᖓ ᐊᒻᒪᓗ ᑐᕙᐃᔪᐃᑦᑐᖅ ᐱᓪᓗᒍ ᐊᖏᕈᑎᓕᐅᕐᓂᒃᑯᑦ,” ᐅᖃᖅᑐᓂ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑕ ᐊᖓᔪᖅᑳᖓᑦ ᐸᐅᓗᓯ ᔫᓯᐱ ᐊᕿᐊᕈᖅ. “ᑖᒃᑯᓄᖓ ᓂᐅᕐᕈᓂᕆᓛᖅᑕᕗᑦ ᓄᓇᓕᐅᔪᓄᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᖕᓂᒃ ᑐᓴᕈᒥᓇᖅᑐᓂᒃ ᐅᖃᐅᓯᖃᖅᑎᑦᑎᒍᓐᓇᓛᖅᑐᒍᑦ ᑕᒪᒃᑯᓂᖓ ᐱᕚᓪᓕᕈᑎᒋᔭᐅᒐᔭᖅᑐᑦ ᐃᓄᖕᓄᑦ ᐊᑦᑐᖅᑕᐅᓯᒪᓂᖃᖅᑐᑦ ᓄᓇᓕᖏᖕᓂ ᐊᒻᒪᓗ ᐅᖃᐅᓯᖃᕐᓗᑕ ᖃᓄᐃᓕᐅᓛᓕᕐᓂᑦᑎᓐᓂᒃ ᖃᓄᖅ ᑕᒪᒃᑯᐊ ᑮᓇᐅᔭᑦ ᐊᑐᖅᑕᐅᔪᓐᓇᓛᕐᒪᖔᕐᒥᒃ.”

ᐋᒡᒌᓯ 2019ᖑᑎᓪᓗᒍ, ᑲᓇᑕᒥ ᒐᕙᒪᒃᑯᑦ ᐊᒻᒪᓗ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐊᑎᓕᐅᓚᐅᖅᑑᒃ ᐱᔭᕇᖅᑕᐅᓯᒪᔪᒥᒃ ᐃᓄᐃᑦ ᐊᑦᑐᖅᑕᐅᓂᖏᖕᓄᑦ ᐊᒻᒪᓗ ᐱᕚᓪᓕᕈᑎᒃᓴᖏᖕᓄᑦ ᐊᖏᕈᑎ ᑕᓪᓗᕈᑎᐅᑉ ᐃᒪᖓᓄᑦ ᑲᓇᑕᒥ ᑕᕆᐅᕐᒥ ᐸᐸᑦᑎᕕᒃ ᐊᒻᒪᓗ ᑐᓴᖅᑎᑦᑎᓚᐅᖅᑐᑎᑦ ᑮᓇᐅᔭᓂᒃ ᐊᑐᓛᕐᒪᑕ ᓴᐳᔾᔭᐅᓯᒪᑲᐃᓐᓇᕈᑎᒃᓴᓂᒃ ᑐᕙᐃᔪᐃᑦᑐᖅ ᑕᕆᐅᖅ ᓴᐳᔾᔭᐅᓯᒪᕝᕕᐊ. ᑖᒃᑯᐊ ᑮᓇᐅᔭᑦ ᐱᖃᓯᐅᔾᔨᔪᑦ ᐱᖁᑎᕐᔪᐊᓄᑦ ᐊᑐᖅᑕᐅᓛᕐᓂᖏᑦ ᓲᕐᓗᒃ ᓄᓇᓕᖕᓂ ᑐᓚᒃᑕᕐᕖᑦ ᐊᒻᒪᓗ ᒥᑭᔪᓄᑦ ᐅᒥᐊᕐᓄᑦ ᑐᓚᑦᑕᕐᕖᑦ, ᐊᒥᓱᓄᑦ ᐊᑐᕋᒃᓴᐅᓗᓂ ᐃᒡᓗᐃᑦ ᓲᕐᓗᒃ ᐱᖃᓯᐅᑎᓪᓗᒋᑦ ᓂᕿᓕᕆᕝᕖᑦ, ᐊᒻᒪᓗ ᐊᑑᑎᖃᐅᑦᑎᐊᖅᑐᓂᒃ ᐃᖅᑲᓇᐃᔮᖅᑕᖃᓕᕐᓗᓂ ᐃᓄᖕᓄᑦ ᑕᓪᓕᒪᓂᑦ ᐊᑦᑐᖅᑕᐅᓯᒪᔪᓂᒃ ᓄᓇᓕᖕᓂ ᐊᕙᑎᒥᒃ ᐸᐸᑦᑎᔨᐅᒐᔭᖅᑐᑎᑦ.

ᑕᒪᐃᓐᓂ, ᑕᓪᓗᕈᑎᐅᑉ ᐃᒪᖓ ᐊᒻᒪᓗ ᑐᕙᐃᔪᐃᑦᑐᖅ ᐊᖏᓂᖃᕐᒪᑎᒃ 427,000 ᑭᑉᐹᕆᒃᑐᑦ ᑭᓛᒥᑐᔅ ᐊᖏᓂᓖᑦ ᐊᖏᓂᖅᓴᐅᓪᓗᓂᓗ ᓂᐅᕙᐅᓐᓛᓐ ᐊᒻᒪᓗ ᓛᕙᑐᐊᕆᒥ.

ᓄᓇᓕᖕᓂᑦ ᑲᑎᒪᓂᒃᓴᐃᑦ (ᓯᓚ ᐱᔾᔪᑕᐅᙱᑦᑐᐊᖅᐸᑦ ᐊᒻᒪᓗ ᑭᖑᕙᕈᑎᖃᙱᑐᐊᖅᐸᓪᓗ):):

ᓄᕖᕝᕙ 12, 2019 ᑲᖏᖅᑐᒑᐱᒃ

ᓄᕖᕝᕙ 13, 2019 ᒥᑦᑎᒪᑕᓕᒃ

ᓄᕖᕝᕙ 19, 2019 ᐃᒃᐱᐊᕐᔪᒃᑯ

ᓄᕖᕝᕙ 20, 2019 ᖃᐅᓱᐃᑦᑐᖅ

ᓄᕖᕝᕙ 21, 2019 ᐊᐅᓱᐃᑦᑐᖅ

ᑐᑭᓯᒋᐊᒃᑲᓐᓂᕈᒪᒍᕕᑦ, ᖃᐅᔨᒃᑲᕐᓗᒍ:

ᓯᒪ ᓴᕼᐊᕐ ᔨᐅᕆᕼᐃ,

ᑐᑭᒧᐊᑦᑎᑦᑎᔨ ᑐᓴᐅᒪᖃᑎᒌᑦᑐᓕᕆᓂᕐᒧᑦ,

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ

szerehi@qia.ca

867.975.8413

1.800.667.2742