“ᖁᔭᓕᓪᓚᕆᑦᑐᑦ” ᐃᓕᓐᓂᐊᖅᑏᑦ ᑐᓂᓯᔭᐅᓚᐅᖅᑎᓪᓗᒋᑦ 2019-2020 ᐊᕐᕌᒍᒥ ᕿᑭᖅᑕᓂᒃᑯᓐᓂ ᐃᓕᓐᓂᐊᓂᕐᒧᑦ ᐃᑲᔫᓯᐊᖅᑖᖅᑎᑕᐅᓂᖏᓐᓂᒃ
ᐅᑐᐱᕆ 8ᖑᑎᓪᓗᒍ, ᓇᓗᓇᐃᕐᓯᔪᒐᑦᑕ ᕿᑭᖅᑕᓂᒃᑯᑦ ᐃᓕᓐᓂᐊᓂᕐᒧᑦ ᐃᑲᔫᓯᐊᔅᓴᖏᓐᓂᒃ ᓯᓚᑦᑐᓴᕐᕕᒻᒥ ᐃᓕᓐᓂᐊᖅᑎᓄᑦ ᐃᓕᓐᓂᐊᖅᑐᓄᑦ 2019-2020 ᐊᕐᕌᒍᒥ ᐃᓕᓐᓂᐊᕐᓇᒥ. ᕿᓚᒥᓪᓚᕆᐊᓗᒃ ᐊᒥᓱᐊᓗᓐᓄᑦ ᑎᑎᕋᕐᕕᐅᖃᑦᑕᓕᔪᒐᑦᑕ ᖃᕋᓴᐅᔭᒃᑯᑦ ᐃᓕᓐᓂᐊᓂᕐᒧᑦ ᐃᑲᔫᓯᐊᖅᑖᖅᑐᓂᑦ.
ᐃᓚᖏᑦ ᐃᓕᓐᓂᐊᖅᑏᑦ ᓄᓇᕗᑦ ᓯᓚᑦᑐᓴᕐᕕᒻᒥᑦ ᓄᓇᖅᑲᑎᑦᑎᓐᓂᒃ ᓂᕆᕕᔾᔪᐊᑎᑦᑎᓂᑦᑎᓐᓄᑦ ᐅᐸᔅᓯᒪᔪᔪᑦ ᐃᖃᓗᓐᓂ ᐅᑐᐱᕆ 9ᖑᑎᓪᓗᒍ ᖁᔭᓐᓇᒦᕆᐊᖅᑐᖅᑐᑎᒃ ᕿᑭᖅᑕᓂᒃᑯᓐᓂᑦ ᐃᑲᔪᖅᑕᐅᓂᖏᓐᓄᑦ ᐊᒻᒪᓗ ᐊᐃᔅᓯᖃᑦᑕᖅᑐᑎᒃ ᓯᒃᑭᑖᖏᓐᓂᒃ ᐅᑭᐊᔅᓵᖅ ᐊᑐᕐᓂᐊᖅᑕᖏᓐᓂᒃ.
80 ᐃᓕᓐᓂᐊᓂᕐᒧᑦ ᐃᑲᔫᓯᐊᔅᓴᐅᓕᕐᒥᔪᑦ $2,500/ᐊᕐᕌᒍᑕᒫᑦ ᐱᔭᔅᓴᐅᖃᑦᑕᕐᖓᑕ, ᑐᓂᔭᐅᓚᐅᖅᑐᑦ ᓯᕗᓪᓕᕐᐹᑐᐃᓐᓇᕐᓄᑦ−ᑐᔅᓯᕋᐅᓯᐅᖅᑳᖅᑐᓄᑦ ᐃᓕᓐᓂᐊᖅᑎᓄᑦ ᕿᑭᖅᑕᓂ ᓄᓇᓕᓐᓄᑦ ᓯᓚᑦᑐᓴᕐᕕᒻᒥ ᐃᓕᓐᓂᐊᖅᑐᓄᑦ.
ᑕᕝᕙᐅᑯᐊ ᐃᒫᒃ ᐃᓕᓐᓂᐊᓂᕐᒧᑦ ᐃᑲᔫᓯᐊᖅᑖᓚᐅᖅᑐᑦ ᐅᖃᖃᑦᑕᓚᐅᖅᑐᑦ:
“ᖁᔭᓐᓇᒦᕈᒪᕙᔅᓯ ᑕᐃᒫᒃ ᑐᓴᖅᑎᑕᐅᒐᒪ! ᖁᔭᓕᑦᑎᐊᖅᑐᖓ.”
ᐊᓖᓴ ᓯᑑᐊᑦ
“ᖁᔭᒋᑦᑎᐊᑕᒃᑲ ᕿᑭᖅᑕᓂᒃᑯᑦ ᐃᑲᔫᑎᖏᓐᓄᑦ . . . ᐊᑑᑎᑎᑦᑎᐊᕐᖓᑕ ᐃᓕᓐᓂᐊᖅᑎᓄᑦ ᐃᓚᑦᑎᓄᓪᓗ.”
ᔮᔅᒥᓐ ᕆᑦᕗᓐ
“ᖁᔭᓐᓇᒦᕐᐹᓘᔪᓯ ᑐᓴᕈᒥᓇᓪᓚᕆᒻᒪᑦ! ᑖᒃᑯᐊ ᐃᓕᓐᓂᐊᓂᕐᒧᑦ ᐃᑲᔫᓯᐊᖅᑖᒃᑲ ᖁᔭᒋᑦᑎᐊᑕᒃᑲ!”
ᑭᐅᕋᓐ ᐊᒡᓘᒃᑲᖅ
“ᖁᔭᓐᓇᒦᒃ ᑐᓴᕈᒥᓇᖅᑐᒥᒃ ᑐᓴᖅᑎᑕᐅᒐᒪ, ᑖᒃᑯᐊ ᐊᑭᓕᐅᑏᑦ ᐃᑲᔫᑎᖃᓪᓚᕆᓐᓂᐊᖅᑐᑦ ᐃᓕᓐᓂᐊᕈᑎᓐᓄᑦ.”
ᓵᓕ ᖁᒻᒧᐊᑦᑐᖅ
“ᖁᕕᐊᒋᓪᓚᕆᑦᑕᒃᑲ ᐅᐱᓐᓇᕋᓂ ᐃᑲᔫᑎᖃᕐᓂᐊᕐᒥᒻᒪᑕᑦᑕᐅᖅ ᐅᕙᖓ ᐊᑐᕆᐊᖃᖅᑕᖏᓐᓄᑦ, ᖃᕋᓴᐅᔭᕋᓛᖅᑖᕆᐊᔅᓵᕋᒪ.”
ᑳᑎ ᐱᑯᔭᒃ
“ᑖᒃᑯᐊ ᖁᕕᐊᒋᓪᓚᕆᑦᑕᒃᑲ ᐃᓕᓐᓂᐊᓂᕐᒧᑦ ᐃᑲᔫᓯᐊᖅᑖᒃᑲ, ᖁᔭᓐᓇᒦᓪᓚᕆᐊᓗᒃ.”
ᔭᐃᒥᓯ ᑯᑉᓗ
“ᖁᔭᓐᓇᒦᕈᒪᔭᒃᑲ ᕿᑭᖅᑕᓂᒃᑯᑦ ᑖᒃᑯᓄᖓ ᐃᓕᓐᓂᐊᓂᕐᒧᑦ ᐃᑲᔫᓯᐊᖅᑖᓐᓄᑦ, ᖁᔭᓕᓪᓚᕆᑦᑐᖓ ᑖᒃᑯᐊ ᐃᓕᓐᓂᐊᓂᕐᒧᑦ ᐃᑲᔫᓯᐊᖅᑖᒃᑲ ᐊᑐᕐᓂᐊᕐᖓᑕ ᐃᓕᓐᓂᐊᕈᑎᓐᓄᑦ, ᐃᓕᓐᓂᐊᕋᒪ ᖁᕝᕙᓯᓐᓂᕐᐹᖓᓂᒃ ᐃᖅᑲᓇᐃᔭᕐᕕᓕᕆᓂᕐᒥᒃ ᐊᐅᓚᑦᑎᔨᐅᓂᕐᒥᒃ.”
ᔭᐃᒥᓯ ᐋᕆᐊᒃ
