ᓇᑭᑦ ᓂᐅᕕᕋᕐᕕᓴᐅᒻᒪᖔᖅ ᑕᒫᓂ ᕿᑲᕐᓇᐅᓂᐊᖅᑐᒥ ᐃᑲᔪᕐᓗᒋᑦ ᐃᓄᐃᑦ ᓇᒻᒥᓂᖅ ᐃᖅᑲᓇᐃᔭᕐᕕᖁᑎᓖᑦ
ᓇᑭᑦ ᓂᐅᕕᕋᕐᕕᓴᐅᒻᒪᖔᖅ ᑕᒫᓂ ᕿᑲᕐᓇᐅᓂᐊᖅᑐᒥ ᐃᑲᔪᕐᓗᒋᑦ ᐃᓄᐃᑦ ᓇᒻᒥᓂᖅ ᐃᖅᑲᓇᐃᔭᕐᕕᖁᑎᓖᑦ
ᑕᒫᓂ ᕿᑲᕐᓇᐅᓂᐊᖅᑐᒥ, ᐃᑲᔪᖃᑦᑕᓂᐊᖅᑯᓯ ᐃᓄᓐᓂᑦ ᓇᒻᒥᓂᖅ ᐃᖅᑲᓇᐃᔭᕐᕕᖁᑎᓕᓐᓂᑦ ᕿᑭᖅᑕᓂ ᓄᓇᓕᓐᓂᑦ. ᑕᕝᕙᐅᑯᐊ ᑭᒃᑰᒻᒪᖔᑕ ᐃᓄᓐᓄᑦ−ᐊᐅᓚᑕᐅᓪᓗᑎᒃ ᐃᖅᑲᓇᐃᔭᕐᕕᖁᑎᒋᔭᐅᔪᑦ ᑐᓐᓂᖅᑯᑎᔅᓴᑦᑎᐊᕚᓗᓐᓂᑦ ᓂᐅᕕᐊᔅᓴᖃᕐᐸᑦᑐᑦ ᑭᒃᑯᑐᐃᓐᓇᕐᓄᑦ ᑐᓂᔭᔅᓴᓂᑦ.
ᕿᓂᕈᕕᑦ ᐊᔾᔨᒋᔭᐅᙱᑦᑐᓂᑦ ᑕᑯᒥᓴᐅᑎᓂᑦ ᖃᐅᔨᒋᐊᕈᓐᓇᖅᑕᑎᑦ ᒫᑎᐅ ᓄᕿᙵᐅᑉ ᓴᓇᐅᒐᖏᑦ ᖃᕋᓴᐅᔭᒃᑯᑦ ᐅᕝᕙᓘᓐᓃᑦ ᓴᓇᕕᖓᓂ. ᓄᕿᙵᖅ ᐃᖃᓗᓐᓂ−ᓄᓇᖃᖅᑐᓂ ᓴᓇᙳᐊᖅᑎ ᓴᓇᑦᑎᐊᓲᕐᐹᓘᓪᓗᓂ ᓴᕕᕋᔭᕐᓂᑦ. ᐃᓄᐃᑦ ᐃᓕᖅᑯᓯᖓᓐᓃᙶᕐᓯᒪᔪᓂᑦ ᐱᖅᑯᓯᖓᓐᓃᙶᕐᓯᒪᔪᓂᑦ ᐱᔾᔪᑎᖃᖅᑐᓂ ᑕᑯᖅᑯᔾᔨᒍᒪᓯᒪᓂᖓᓄᑦ ᓴᓇᑦᑎᐊᕈᑎᒋᖃᑦᑕᖅᑕᖓ ᐊᔾᔨᐅᖏᑦᑐᓂᑦ, ᐊᑐᕈᒥᓇᖅᑐᓂᑦ ᓴᓇᐅᒐᕐᓂᑦ.
ᕿᓂᕈᕕᑦ ᓴᓇᐅᒐᕐᓂᑦ ᐅᐊᓴᐅᑎᓂᑦ ᐊᒻᒪᓗ ᐊᒡᒐᔅᓯᐅᑎᓂᑦ ᓴᓇᓯᒪᓪᓗᑎᒃ ᐅᑭᐅᖅᑕᖅᑐᒦᙶᕐᓯᒪᔪᓂᑦ ᐊᑐᖅᑐᑎᒃ − ᐆᑦᑐᕈᓐᓇᖅᑕᓯ ᐅᐊᓴᐅ ᐅᐊᓴᐅᑎᓕᐊᕆᕙᑦᑕᖏᑦ ᐱᐅᔫᑎᐊᓗᐃᑦ. ᑎᒥᖁᑎᒋᔭᐅᔪᖅ ᑖᓐᓇ ᐃᓚᒌᓄᑦ ᐊᐅᓚᑕᖅ ᑖᔅᓱᒥᖓ ᐊᐅᓚᑦᑎᔨᐅᔫᒃ ᕗᓃᔅ ᑲᓛᒃ ᐅᐃᖓᓗ ᑖᒃᑯᐊ ᐊᑐᓲᑦ ᐊᖑᓂᑦᑕᐅᓂᑯᓃᙶᕐᓯᒪᔪᓂᑦ ᐃᓄᐃᑦ ᓄᓇᖓᓐᓂ ᐅᐊᓴᐅᑎᓕᐅᕈᑎᒋᕙᑦᑐᒋᑦ ᐊᒋᐅᔾᔭᒐᕐᓂᓪᓗ ᐅᔾᔨᓇᕐᓯᑎᑦᑎᕙᑦᑐᑎᒃ ᓄᓇᒦᙶᕐᓯᒪᔪᓂᑦ ᐃᒪᕕᖓᓃᙶᕐᓯᒪᔪᓂᓪᓗ.
ᓴᓇᐅᒐᕐᓂᑦ ᐱᐅᔅᓴᒃᑳᓘᒍᕕᑦ ᓂᐅᕕᕆᐊᖃᖅᑐᑎᑦ, ᑕᐃᔪᓪ ᑯᑉᓗᐃᑦᑑᑉ ᖃᕋᓴᐅᔭᒃᑯᑦ ᓴᓇᐅᒐᖓᓂᒃ. ᑯᑉᓗᐃᑦᑑᑉ ᓴᓇᐅᒐᖓ ᑎᓴᒪᓂᑦ ᐊᑐᕆᐊᓂᑦ ᓄᖅᑲᑕᕐᕕᒃ, ᑖᓐᓇ ᐃᓕᓴᕆᔭᐅᓯᒪᓪᓗᓂ ᓯᓚᐱᐊᖓᓂ ᐊᔾᔨᙳᐊᖁᑎᒋᔭᖅ ᐅᖄᓚᐅᓯᕆᔨᒃᑯᓐᓂᑦ ᓄᐊᔅᕕᔅᑎᐅᑯᓐᓂᑦ 2019/20 ᐅᖄᓚᐅᑎᓯᐅᑎᓂᑦ. ᑖᓐᓇ ᓴᓇᖃᑦᑕᓲᖅ ᖃᕋᓴᐅᔭᒃᑯᑦ ᐱᔾᔪᑎᖃᕐᐸᑦᑐᓂ ᐋᖅᑭᓱᕐᓯᒪᑦᑎᐊᖅᑐᓂᑦ ᐃᓄᙳᐊᓂᑦ, ᐅᓂᒃᑳᖅᑐᐊᓃᙶᕐᓯᒪᔪᓂᑦ ᐊᒻᒪᓗ ᐃᓄᐃᑦ ᐃᓅᓯᖏᑕ ᒥᔅᓵᓅᖓᔪᓂᑦ. ᓴᓇᖃᑦᑕᖅᑕᖏᑦ ᒫᓐᓇᓕᓴᖅᑎᑐᑦ ᓴᓇᓯᒪᒐᓗᐊᖅᑐᑎᒃ ᐱᔾᔪᑎᖏᓪᓕ ᐃᓄᐃᑦ ᐃᓕᖅᑯᓯᖓᑕ ᒥᔅᓵᓅᖓᓂᕐᓴᐅᕙᑦᑐᑦ.
ᓂᐅᕕᕈᒪᒍᕕᑦ ᑭᓇᒧᒃᑭᐊᖅ ᒥᕐᓱᕈᒻᒪᐃᓇᕐᒧᑦ ᓂᐅᕕᕆᐊᓚᐅᕐᓂᐊᖅᑯᑎᑦ ᖃᓪᓗᓈᖅᑕᓂᑦ ᖃᓄᐃᑦᑐᑐᐃᓐᓇᑦᑎᐊᓂᑦ ᓂᐅᕕᐊᔅᓴᓕᓐᓄᑦ ᒥᕐᓱᑐᕐᓯᐅᑎᖃᐅᖅᑐᑎᓪᓗ ᑖᒃᑯᐊ ᐃᖃᓗᓐᓃᑦᑐᑦ ᒥᖅᓱᖅᑕ.
ᑖᓐᓇ ᐅᐃᑦ ᓴᓇᒃᑳᓗᒃ ᑕᑯᒥᓴᐅᑎᓂᑦ ᐃᓅᓂᑰᓪᓗᓂ ᐃᖃᓗᐃᑦ ᑕᓯᐅᔭᕐᔪᐊᖓᓂ, ᐃᖃᓗᐃᑦ ᖃᓂᒋᔭᖓᓂ. ᐅᐃᑦ ᓴᓇᖃᑦᑕᕈᒪᓯᓚᐅᕐᓯᒪᔪᖅ ᓴᓇᙳᐊᓲᖑᓚᐅᕐᖓᑕ ᐃᓚᖏᑦ ᑕᐃᒫᓪᓗ ᑕᑯᒥᓴᐅᑎᓕᐅᖃᑦᑕᓕᕐᓂᑰᓪᓗᓂ. ᑖᓐᓇ ᖃᐅᔨᒪᔭᐅᑦᑎᐊᖅᑐᖅ ᓴᓇᖃᑦᑕᓲᖏᓐᓄᑦ ᐊᖅᓴᕐᓂᙳᐊᖑᓪᓗᑎᒃ ᓇᒡᒍᐊᕐᒥᓕᐊᕆᕙᑦᑕᖏᓐᓄᑦ.
ᑖᓐᓇ ᐃᖃᓗᐃᑦ ᐊᓪᓕᕐᐹᒥᐅᖏᓐᓂ ᐃᓂᓕᒃ, ᒪᓕᒃᑳᑦ “ᐃᓘᓐᓇᖏᓐᓂᒃ ᐃᓄᐃᑦ ᐃᒋᕐᕈᑎᖏᓐᓂᒃ” ᓂᐅᕕᐊᔅᓴᖃᓲᖅ ᒪᑯᓂᖓ ᐱᖅᑯᓯᖅᑎᒍᑦ ᐃᒋᕐᕈᑎᓂᑦ, ᐃᓄᐃᑦ ᓴᓇᐅᒐᖏᑦ, ᓴᕕᕋᔭᐃᑦ, ᑑᒑᑦ, ᓱᖅᑲᐃᑦ ᐊᒻᒪᓗ ᓇᒡᔪᐃᑦ ᑕᑯᒥᓴᐅᑏᑦ, ᑎᑎᖅᑐᒐᐃᑦ ᐊᒻᒪᓗ ᐅᖃᓕᒫᒐᓕᐅᖅᑏᑦ Inhabit media ᐅᖃᓕᒫᒐᓕᐊᕆᓯᒪᔭᖏᑦ. ᐊᒥᓱᐊᓘᖃᑦᑕᕐᒥᔪᑦ ᖃᓄᐃᑦᑐᑐᐃᓐᓇᑦᑎᐊᑦ ᕿᓯᓐᓂᑦ ᓴᓇᓯᒪᔪᑦ ᓲᕐᓗ ᒪᑯᐊ ᐳᐊᓗᐃᑦ, ᐱᓂᕋᐃᑦ, ᓯᐅᑕᐃᓕᓴᐃᑦ ᓂᐅᕕᐊᔅᓴᐅᕙᑦᑐᑦ ᓂᐅᕕᕐᕕᒻᒥ.
ᑖᓐᓇ ᐃᓂᓕᒃ ᐃᖃᓗᓐᓂ, ᓄᓇᑦᑕ ᓱᓇᒃᑯᑖᖏᑦ ᑕᑯᔭᒐᖃᕐᕕᑐᐊᑦᑎᐊᖅ ᓄᓇᕗᒥ. ᑕᑯᔭᒐᖃᕐᕕᒃ ᐃᓂᒋᔭᐅᔪᓐᓇᑎᐊᕐᐸᑦᑐᖅ ᐃᓄᐃᑦ ᓴᓇᐅᒐᖏᓐᓄᑦ ᐊᒻᒪᓗ ᑎᑎᖅᑐᒐᕐᓄᑦ ᐊᒻᒪᓗ ᑕᑯᔭᒐᐅᑲᐃᓐᓇᖃᑦᑕᓂᐊᖅᑐᓄᑦ ᓴᖅᑭᔮᖅᑎᑕᐅᔪᓄᑦ ᒫᓐᓇᓕᓴᕐᓄᑦ ᓴᓇᐅᒐᕐᓄᑦ. ᑕᐃᑲᓂ ᑕᑯᒐᔭᖅᑐᑎᑦ ᖃᓄᐃᑦᑐᑐᐃᓐᓇᑦᑎᐊᓂᑦ ᑎᑎᖅᑐᒐᕐᓂᑦ, ᓴᓇᐅᒐᕐᓂᑦ, ᑕᑯᒥᓴᐅᑎᓂᑦ ᐊᒻᒪᓗᑦᑕᐅᖅ ᐊᓯᖏᓐᓂᑦ ᓴᓇᐅᒐᕐᓂᑦ ᐃᑦᑕᕐᓂᓴᕐᓂᓪᓗ ᓂᐅᕕᐊᔅᓴᓂᑦ ᑕᑯᔭᒐᖃᕐᕕᒻᒥ.
ᓴᓇᙳᐊᒐᑦ ᓄᓇᕗᒥ ᐊᒥᓱᐊᓗᓐᓂᑦ ᐃᓄᐃᑦ ᓴᓇᐅᒐᖏᓐᑦᓂ ᓴᓇᙳᐊᒐᖏᓐᓂᓪᓗ ᐱᑕᓕᒃ ᓇᑭᑐᐃᓐᓇᑦᑎᐊᖅ ᓄᓇᕗᒻᒥ ᓴᓇᔭᐅᓂᑯᓂᑦ. ᑕᐅᓴᓐᖏᓐᓃᑦᑐᑦ ᓴᓇᐅᒐᐃᑦ ᓄᑖᓂᓪᓗ ᐃᓚᓯᕙᒻᒥᔪᑦ ᓴᓇᐅᒐᖃᕐᕕᒻᒧᑦ ᖃᐅᑕᒫᑦ.
ᐅᖅᑯᕐᒥᐅᑦ ᓴᓇᐅᒐᖃᕐᕕᒃ ᓴᓇᐅᒐᕐᓄᑦ ᒥᕐᓱᒐᕐᓄᓪᓗ
ᐅᖅᑯᕐᒥᐅᑦ ᓴᓇᐅᒐᖃᕐᕕᒃ ᐃᑲᔪᕐᐸᑦᑐᖅ ᐃᓘᓐᓇᖏᓐᓂᒃ ᓴᓇᕙᑦᑐᓂᑦ ᒥᕐᓱᒐᓕᐅᕐᐸᑦᑐᓂᓪᓗ ᐸᓐᓂᖅᑑᕐᒥᐅᓂᑦ, ᐃᓂᖃᖅᑎᑎᓪᓗᑎᒃ ᓱᓇᒃᑯᑖᖃᖅᑎᑦᑎᕙᑦᑐᑎᓪᓗ ᐸᓐᓂᖅᑑᖅ ᑎᑎᖅᑐᒐᕐᕕᖓᓂ, ᐸᓐᓂᖅᑑᒥ ᓄᕕᕐᓴᕐᕕᒻᒥ, ᐊᒻᒪᓗ ᓂᐅᕕᕐᕕᕋᓛᖃᖅᑐᓂ ᓴᓇᐅᒐᕐᓂᑦ ᓂᐅᕕᐊᔅᓴᖃᕐᐸᑦᑐᑎᒃ. ᐅᖅᑯᕐᒥᐅᑦ ᓴᓇᐅᒐᖃᕐᕕᒃ ᓂᐅᕕᕐᕕᓇᓪᓚᕆᐅᕗᖅ ᐊᔾᔨᒌᙱᑦᑐᓂᑦ ᓄᕕᕐᓴᖅᑕᐅᓂᑯᓂᑦ ᓲᕐᓗ ᒪᑯᓂᖓ ᐸᖕᓂᖅᑑᕐᒥᐅᑎᑐᑦ ᓇᓴᓕᐊᖑᓯᒪᔪᓂᑦ ᖁᖓᓯᕈᓕᐊᖑᓯᒪᔪᓂᓪᓗ. ᓴᓇᐅᒐᖃᕐᕕᒃ ᐊᒥᓱᐊᓗᓐᓂᑦ ᑎᑎᖅᑐᒐᖁᑎᖃᖃᑦᑕᕐᒥᔪᖅ ᓂᐅᕕᐊᔅᓴᓂᑦ. ᑐᓂᔭᔅᓴᓂᑦ ᓂᐅᕕᐊᔅᓴᖃᕐᕕᖓ ᓂᐅᕕᐊᔅᓴᖃᕐᐸᑦᑐᖅ ᓴᓇᙳᐊᒐᕐᓂᑦ ᑕᑯᒥᓴᐅᑎᓂᓪᓗ ᓴᓇᔭᐅᓂᑯᓂᑦ ᐸᓐᓂᖅᑑᕐᒥᐅᓄᑦ ᓴᓇᕙᑦᑐᓄᑦ.
ᓄᓇᑦᑎᓐᓂ ᐅᖃᓕᒫᒐᓕᐅᖅᑏᑦ ᐃᑲᔪᖅᑎᒌᑦᑐᑎᒃ ᐱᓕᕆᖃᑎᖃᖃᑦᑕᕐᓯᒪᔪᑦ ᕿᑭᖅᑕᓂᒃᑯᓐᓂᑦ ᐊᒥᓱᐊᓗᓐᓂᑦ ᐊᕐᕌᒍᓂᑦ ᑲᑐᔾᔨᖃᑎᒌᖃᑦᑕᖅᑐᑎᒃ ᐃᑲᔪᖃᑦᑕᕈᒪᓪᓗᑎᒃ ᐃᓄᒃᑎᑐᑦ ᐅᖃᓕᒫᖃᑦᑕᓂᕐᒥᒃ. ᑕᐃᑲᓂ ᑕᑯᔭᔅᓴᖅᑕᓕᒃ ᖃᓄᐃᑦᑐᑐᐃᓐᓇᑦᑎᐊᓂᑦ ᐅᖃᓕᒫᒐᕐᓂᑦ, ᐱᓗᐊᖅᑐᒥᑦ ᓱᕈᓯᕐᓯᐅᑎᓂᑦ ᐅᖃᓕᒫᒐᕐᓂᑦ ᖃᓪᓗᓈᑎᑑᖓᔪᓂᑦ ᐃᓄᒃᑎᑑᖓᔪᓂᓪᓗ ᑎᑎᕋᖅᑕᐅᓂᑯᓂᑦ ᐃᓄᓐᓄᑦ ᑎᑎᕋᖅᑎᓄᑦ ᐅᖃᓕᒫᒐᓕᐅᕐᕕᒻᒥ, ᐃᓚᒋᔭᐅᕙᑦᑐᑎᒃ ᒪᑯᐊ ᐅᖃᓕᒫᒐᓕᐊᖑᓯᒪᔪᑦ ᑲᑐᔾᔨᖃᑎᖃᖅᑐᑎᒃ ᕿᑭᖅᑕᓂᒃᑯᓐᓂᑦ. ᐅᖃᓕᒫᒐᓕᐅᖅᑏᑦ ᓯᕗᓪᓕᕐᐹᖑᓪᓗᑎᒃ ᐃᓄᓐᓄᑦ−ᓇᒻᒥᓂᕆᔭᐅᓪᓗᑎᒃ, ᓇᒻᒥᓂᕐᓱᖅᑐᑎᒃ ᐅᖃᓕᒫᒐᓕᐅᖃᑦᑕᓂᕐᒧᑦ ᑎᒥᐅᔪᑦ ᑲᓇᑕᒥ ᐅᑭᐅᖅᑕᖅᑐᒥ ᑐᕌᒐᖃᖅᑐᑎᒃ ᓴᖅᑭᔮᖅᑎᑦᑎᒋᐊᒃᑲᓐᓂᕈᒪᓪᓗᑎᒃ ᐆᒪᐃᓐᓇᖁᔨᓪᓗᑎᓪᓗ ᐅᓂᒃᑳᓂᑦ, ᖃᐅᔾᔨᑎᒋᔭᐅᔪᓂᑦ, ᐊᒻᒪᓗ ᐊᔪᙱᓐᓂᖏᓐᓂᒃ ᐅᑭᐅᖅᑕᖅᑐᒥᐅᑦ, ᐃᑲᔪᖃᑦᑕᓯᓐᓈᕆᓪᓗᑎᒃ ᑐᑭᓯᓇᓱᖃᑦᑕᓂᕐᒥᒃ ᐃᓄᐃᑦ ᐅᓂᒃᑳᖅᑐᐊᖏᓐᓂᒃ ᐊᒻᒪᓗ ᐱᖅᑯᓯᖅᑎᒍᑦ ᐃᓄᐃᑦ ᖃᐅᔾᔨᑎᖏᓐᓂᒃ ᓄᓇᕗᒻᒥᐅᓂᑦ.
ᐊᓕᐊᓇᐃᑦ ᐊᒥᓱᕐᔪᐊᕌᓗᓐᓂᑦ ᕿᓪᓕᖅᑐᓂᑦ ᓂᐱᔅᓴᖁᑎᓖᑦ ᐊᒻᒪᓗ ᓂᐱᖁᑎᓖᑦ ᐃᓄᐃᑦ ᓂᐱᖏᓐᓂᑦ ᓂᐅᕕᐊᔅᓴᖃᐅᖅᑐᑎᒃ ᐊᒻᒪᓗᑦᑕᐅᖅ ᐊᓯᖏᓐᓂᒃ ᓂᐅᕕᐊᔅᓴᖃᖃᑦᑕᕆᓪᓗᑎᒃ ᐊᕐᕌᒍᑕᒫᑦ ᑕᑯᕋᓐᓈᑎᑦᑎᔾᔪᑎᒋᖃᑦᑕᕐᓯᒪᔭᖏᓐᓂᑦ. ᓂᐅᕕᕈᓐᓇᕐᒥᔪᑎᑦ ᑕᑯᕋᓐᓈᑎᑦᑎᓂᕆᓂᐊᖅᑕᖏᓐᓄᑦ ᐃᓯᕈᑎᔅᓴᓂᑦ, ᐊᕐᕌᒍᑕᒫᑦ ᐃᓚᒋᔭᐅᔾᔪᑎᓂᑦ ᐊᒻᒪᓗ ᐊᕐᕌᒍᑕᒫᑦ ᑕᑯᕋᓐᓈᑎᑦᑎᓂᕆᕙᑦᑕᖏᓐᓄᑦ ᐃᓯᕈᑎᓂᑦ ᐊᓕᐊᓇᐃᒃᑯᓐᓂᑦ ᓂᔾᔭᐅᓯᔭᕐᓂᕐᒥᒃ ᖁᕕᐊᒋᔭᖃᓗᐊᙳᐊᖅᑐᓄᑦ ᐃᓅᖃᑎᔅᓯᓐᓄᑦ. ᐊᓕᐊᓇᐃᒃᑯᑦ ᐱᔾᔪᑎᖃᕐᖓᑕ ᐃᑲᔪᖃᑦᑕᕈᒪᓪᓗᑎᒃ ᐱᕙᓪᓕᐊᑎᑦᑎᓂᕐᒥᒃ ᐃᓅᓯᖃᑦᑎᐊᓂᕐᒥᒃ ᓄᓇᕗᒥ ᓂᔾᔭᐅᓯᔭᖃᑦᑕᓂᒃᑯᑦ. ᐊᓕᐊᓇᐃᒃᑯᑦ ᐋᖅᑮᕙᑦᑐᑦ ᑕᑯᕋᓐᓈᖅᑕᐅᕕᔅᓴᒥᑦ ᐃᓄᓐᓄᑦ ᐊᒻᒪᓗ ᐊᓯᖏᓐᓄᑦ ᐅᑭᐅᖅᑕᖅᑐᒥᐅᓄᑦ ᓂᔾᔭᐅᓯᔭᖅᑎᓄᑦ ᑲᑎᑎᑦᑎᕙᑦᑐᑎᒃ ᖁᕕᐊᓇᖅᑐᐊᓗᒻᒥᑦ ᑐᓴᕐᓂᓂᕐᐹᓂᑦ ᓂᔾᔭᐅᓯᔭᖅᑎᓂᑦ, ᐱᙳᐊᕈᓘᔭᖅᑎᓂᑦ, ᒧᒥᖅᑎᓂᑦ, ᐅᓂᒃᑳᑐᐊᖅᑎᓂᑦ, ᑕᑯᓐᓇᕋᔅᓴᓕᐅᖅᑎᓂᑦ ᐊᒻᒪᓗ ᑕᑯᔭᔅᓴᓂᑦ ᓴᓇᓲᓂᑦ ᓇᑭᑐᐃᓐᓈᕐᓯᒪᔪᓂᑦ ᓄᓇᕐᔪᐊᕐᒥ.
ᕕᐊᑭ ᕿᓚᕝᕙᖅ
ᕕᐊᑭ ᕿᓚᕝᕙᖅ ᖃᓄᐃᑦᑐᑐᐃᓐᓇᑦᑎᐊᓂᑦ ᓂᐅᕕᐊᔅᓴᖃᕐᐸᑦᑐᖅ ᐊᓐᓄᕌᓂᑦ ᓴᓇᐅᒐᕐᓂᓪᓗ ᓂᐅᕕᐊᕆᔭᔅᓴᐅᓪᓗᑎᒃ ᖃᕋᓴᐅᔭᒃᑯᑦ ᑐᑭᓯᒋᐊᕈᑎᖃᕐᕕᖓᓂ. ᕕᐊᑭ ᓇᒻᒥᓂᖅ−ᐃᓕᓯᒪᓪᓗᓂ ᑎᑎᖅᑐᒐᖅᑎ ᐸᓐᓂᖅᑑᕐᒥᐅᑕᔅᓴᔭᐅᓪᓗᓂ ᓂᐅᕕᐊᔅᓴᖃᕐᐸᑦᑐᖅ ᐱᐅᔫᑎᐊᓗᓐᓂᑦ ᐊᑐᕈᒥᓇᖅᑐᑎᓂᓪᓗ ᐊᓐᓄᕌᓂᑦ ᐊᒻᒪᓗ ᑭᓱᑐᐃᓐᓇᕐᓂᑦ ᖁᕕᐊᓲᑎᓕᓐᓂᑦ ᐊᔾᔨᒋᔭᐅᙱᑦᑐᓂᑦ ᐃᓄᐃᑦ ᐃᓕᓴᕐᓇᕈᑎᖏᓐᓂᑦ ᐊᒻᒪᓗ ᐃᑦᑕᕐᓂᓴᖁᑎᖏᓐᓂᑦ. ᕕᐊᑭ ᓴᓇᖃᑦᑕᓲᖑᒻᒥᔪᖅ ᓄᑖᓂᑦ ᐃᓕᓐᓂᐊᕈᑎᔅᓴᓂᑦ ᓲᕐᓗ ᐊᑏ ᐱᙳᐊᕈᑦ, ᐊᒻᒪᓗ ᓴᓇᖃᑎᒋᓯᒪᔭᖏᑦ ‘ᐃᓕᓐᓂᐊᓇᕐᓯᕗᖅ: Time for School’ ᖃᕋᓴᐅᔭᒃᑯᑦ ᐊᑐᕋᔅᓴᖅ.
ᓄᓇᕗᑦ ᓴᓇᙳᐊᖅᑏᑦ ᑲᑐᔾᔨᖃᑎᒌᖏᑦ (ᓈᑲ) ᐅᐸᒐᔅᓴᐅᑦᑎᐊᕐᒥᔪᑦ ᓂᐅᕕᕆᐊᕐᕕᒋᓗᒋᑦ ᓴᓇᐅᒐᕐᓂᑦ ᒥᕐᓱᒐᕐᓂᓪᓗ ᓴᓇᔭᐅᓯᒪᔪᓂᑦ ᐃᓄᓐᓄᑦ. ᑕᐃᒪᙵᑦ ᐱᒋᐊᓚᐅᕐᓯᒪᒻᒪᑕ 1998ᒥ, ᓈᑲᒃᑯᑦ ᐱᓕᕆᖃᑎᖃᖃᑦᑕᓲᑦ ᐱᕚᓪᓕᕈᑎᖃᖃᑦᑕᓂᐊᕐᖓᑕ ᓄᓇᕗᒻᒥᐅᑦ ᓴᓇᖃᑦᑕᓲᑦ. ᓈᑲᒃᑯᑦ ᖃᑭᒪᒍᑎᔅᓴᓕᐅᕋᓱᐊᖅᑎᐅᒐᑎᒃ ᑎᒥᙳᕐᓯᒪᓪᓗᑎᒃ ᑲᑐᔾᔨᖃᑎᒌᖑᕗᑦ ᐃᑲᔪᖃᑦᑕᖅᑐᑦ ᐊᒻᒪᓗ ᓴᖅᑭᔮᖅᑎᑦᑎᕙᑦᑐᑎᒃ ᐱᕙᓪᓕᐊᖁᓪᓗᒋᑦ ᐊᒥᓱᕈᕐᐸᓪᓕᐊᖁᓪᓗᒋᓪᓗ ᓄᓇᕗᒻᒥᐅᑦ ᓴᓇᖃᑦᑕᓲᑦ ᒥᕐᓱᖃᑦᑕᓲᓪᓗ ᐃᑲᔪᖅᑐᒋᑦ ᓂᐱᒋᔭᐅᕙᑦᑐᑎᒃ, ᑐᓴᐅᒪᖃᑦᑕᐅᑎᖃᑎᖃᕐᐸᑦᑐᑎᒃ, ᓴᓇᓲᓂᑦ ᐱᕙᓪᓕᐊᑎᑦᑎᕙᑦᑐᑎᒃ, ᐃᓕᓐᓂᐊᑎᑦᑎᖃᑦᑕᓂᒃᑯᑦ ᐊᒻᒪᓗ ᓂᐅᕐᕈᑎᖃᕋᓱᖃᑦᑕᓂᒃᑯᑦ.
Hᐃᓈᓂ ᓴᓇᐅᒐᖏᑦ ᐊᓐᓄᕌᑦ ᑭᓱᑐᐃᓐᓇᐃᓪᓗ ᓴᖅᑭᔮᖅᑎᑦᑎᕙᑦᑐᑦ ᐃᓄᐃᑦ ᐃᓕᖅᑯᓯᖓᓐᓂᑦ, ᐅᖃᐅᓯᖓᓐᓂᑦ, ᐊᒻᒪᓗ ᐃᓅᓯᖓᓐᓂᑦ ᐊᑐᓯᖃᑦᑕᖁᔨᓪᓗᑎᒃ ᓈᒻᒪᑦᑐᒥᒃ ᓇᒻᒥᓂᕐᓱᕈᓐᓇᓂᕐᒥᒃ ᐊᒻᒪᓗ ᐅᐱᒍᓱᓐᓂᕐᒥᒃ ᐃᓄᓐᓂᑦ.
ᓂᐅᕕᕈᒪᒍᕕᑦ ᑕᒧᓗᒐᔅᓴᓂᑦ − ᐆᑦᑐᓚᐅᕐᓂᐊᖅᑯᑎᑦ ᑎᑭᓴᐃᓗᑎᑦ ᑲᐃᒃᒥᑦ, ᓯᕙᐅᔭᕐᓂᑦ ᑲᐃᕋᓛᕐᓂᓘᓐᓃᑦ ᓴᐃ ᕕᓐᓴᓐᑦ−ᐅᓪᕝ ᓂᐅᕕᕐᕕᕋᓛᖁᑎᖓᓂ. ᕕᓐᓴᓐᑦ−ᐅᓪᕝ ᓂᖅᑎᕐᓱᐃᖃᑦᑕᓲᖑᒻᒥᔪᖅ ᑲᑎᒪᔪᓂᑦ − ᐃᓚᑎᑦ ᐱᖃᑏᓪᓘᓐᓃᑦ ᑕᒧᓗᒐᔅᓴᓂᑦ ᐱᑎᔾᔭᓛᙱᒻᒥᒐᕕᒋᑦ ᕿᑲᕐᓇᐅᓂᖓᓂ.
ᓂᐅᕕᕋᔅᓴᕐᓯᐅᕈᕕᑦ ᐃᓄᐃᑦ ᓴᓇᐅᒐᖏᓐᓂᑦ ᐱᐅᔅᓴᒃᑳᓗᒻᒧᑦ, ᖃᐅᔨᒋᐊᕈᓐᓇᖅᑐᑎᑦ ᑎᑎᖅᑐᒐᕐᓂᑦ, ᑎᑎᕋᐅᔭᖅᑕᐅᓂᑯᓂᑦ ᐊᒻᒪᓗ ᓴᓇᐅᒐᕐᓂᑦ ᑕᑯᔭᔅᓴᐅᓪᓗᑎᒃ ᑕᕝᕙᙵᑦ ᑭᙵᕐᓂᑦ ᓴᓇᐅᒐᕐᓂᑦ. ᖃᕋᓴᐅᔭᒃᑯᑦ ᑐᑭᓯᒋᐊᕈᑎᖃᕐᕕᖓᓐᓂ ᑕᑯᔭᔅᓴᐃᑦ ᐊᕐᕌᒍᑕᒫᑦ ᑭᙵᕐᓂᑦ ᑎᑎᖅᑐᒐᐃᑦ ᓄᐊᑕᐅᓂᑰᕙᑦᑐᑦ ᐊᒻᒪᓗᑦᑕᐅᖅ ᑐᑭᓯᐅᒪᔾᔪᑎᔅᓴᖅᑕᖃᖅᑐᓂ ᐃᓚᒋᔭᐅᕙᑦᑐᓂᑦ ᑕᑯᔭᒐᖃᕐᕕᓐᓂᑦ ᑲᓇᑕᒥ ᓇᒥᑐᐃᓐᓇᖅ ᓂᐅᕕᕐᕕᔅᓴᐅᕙᒻᒪᑕ ᑎᑎᖅᑐᒐᕐᓂᑦ. ᑭᙵᕐᓂᑦ ᓴᓇᐅᒐᐃᑦ ᐋᖅᑭᑦᑕᐅᓚᐅᕐᓯᒪᔪᖅ ᐱᕙᓪᓕᐊᑎᑦᑎᓂᐊᕐᖓᑕ ᐊᒻᒪᓗ ᐱᔨᑦᑎᕋᕐᓂᐊᕐᖓᑕ ᓂᐅᕐᕈᑕᐅᖃᑦᑕᕐᓂᖏᓐᓂ ᐃᓄᐃᑦ ᓴᓇᐅᒐᓪᓚᑦᑖᖏᑦ ᓴᓇᔭᐅᓯᒪᔪᑦ ᑎᑎᖅᑐᒐᖅᑎᓄᑦ ᐃᓚᒋᔭᐅᔪᓄᑦ ᐱᖓᓐᓇᖓᓂ ᕿᑭᖅᑖᓘᑉ ᐃᓄᐃᑦ ᑯᐊᐸᒃᑯᖏᓐᓂ.
