ᑖᒃᑯᐊ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ (QIA) ᖁᕕᐊᓲᑎᖃᖅᐳᑦ ᓄᓇᕗᒥ ᓄᑖᕐᒥᑦ ᓂᕈᐊᖅᑕᐅᔪᒥᒃ . ᐃᐊᓐᑏᐲᒃᑯᑦ NDP−ᑯᓐᓄᑦ ᒪᓕᒐᓕᖅᑎᐅᓂᐊᖅᑐᖃᖅ ᑲᓇᑕᐅᑉ ᒪᓕᒐᓕᐅᕐᕕᒡᔪᐊᖓᓂ, ᒧᒥᓛᖅ ᖃᖅᑲᖅ ᓵᓚᒃᓴᓚᐅᕐᓂᖓᓄᑦ ᐃᒃᐸᒃᓴᖅ ᒐᕙᒪᑐᖃᒃᑯᑦ ᓂᕈᐊᖅᓯᕐᓂᖏᓐᓄᑦ ᐊᒻᒪ ᑲᓇᑕᐅᑉ ᐊᖓᔪᖅᑲᒻᒪᕆᐊᑦ ᔭᔅᑕᓐ ᑐᕉᑐ ᑐᒡᓕᐊᓂᒃ ᓂᕈᐊᖅᑕᐅᒃᑲᓐᓂᕈᓐᓇᓚᐅᕐᓂᖓᓄᑦ ᑲᓇᑕᒥᐅᓄᑦ.

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ ᐃᓕᑕᖅᓯᒍᒪᖕᒥᔪᑦ ᐊᒃᓱᕈᖅᑐᓂ ᓕᕗᕈᒃᑯᓐᓄᑦ Liberal ᓂᕈᐊᖅᑕᐅᒐᓱᐊᓚᐅᖅᑐᖅ ᒦᒐᓐ ᐲᔾᔪ ᒪᐃᓪ ᐊᒻᒪ ᑲᓐᓲᕙᑎᕝᑯᓐᓄᑦ Conservative ᓕᐅᓇ ᐊᒡᓘᒃᑲᖅ ᓂᕈᐊᒐᒃᓴᐅᕕᒋᒍᒪᔭᒥᓄᑦ. ᖁᕕᐊᓇᖅᑐᖅ ᑕᑯᓪᓗᓂ ᓴᓐᖏᔪᓂᒃ, ᐅᖃᕈᓐᓇᑦᓯᐊᖅᑐᓂᒃ ᐃᓄᖕᓂᑦ ᐊᕐᓇᓂᒃ ᑭᒡᒐᖅᑐᐃᓂᐊᖅᑐᓂᒃ ᓄᓇᕗᒥ ᒐᕙᒪᑐᖃᒃᑯᓐᓃᓪᓗᓂ.

ᐅᖓᓯᒃᑑᑎᐅᒐᓗᐊᖅᑎᓪᓗᒋᑦ ᓄᓇᒥ ᐃᓂᖃᖅᑐᑦ, ᐊᑕᐅᓯᑐᐃᓐᓇᕐᒥᒃ ᑭᒡᒐᖅᑐᖅᑎᖃᖅᑐᒍᑦ ᑲᓇᑕᐅᑉ ᒪᓕᒐᓕᐅᕐᕕᒡᔪᐊᖓᓂ ᑭᒡᒐᖅᑐᐃᓪᓗᓂ ᐊᖏᔪᒥᒃ ᐊᕕᒃᑐᖅᓯᒪᓂᐅᔪᒥᒃ 21 −ᐳᓴᓐᑎᖓ ᑲᓇᐅᑉ ᓄᓇᕐᔪᐊᖓᑕ ᐊᒻᒪ ᐃᓚᖃᖅᑐᓂ 25 ᓄᓇᓕᐅᔪᓂᒃ ᑎᑭᑕᐅᔪᓐᓇᖅᑐᓂᒃ ᑭᓯᐊᓂ ᖃᖓᑕᔫᒃᑯᑦ, ᐊᖏᔪᒻᒪᕆᐊᓗᒃ ᐱᓕᕆᐊᕆᒋᐊᖃᕐᓗᒍ. ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ ᐅᐱᒋᔭᖃᖅᐳᑦ ᐃᓘᓐᓇᖏᓐᓂᒃ ᐱᖓᓱᓂᒃ ᓂᕈᐊᖅᑕᐅᒐᓱᐊᓚᐅᖅᑐᑦ ᐅᖃᖃᑎᖃᖅᑐᑎᒃ ᐃᓄᖕᓂᑦ ᓄᓇᕗᓕᒫᒥ ᐊᒻᒪ ᐃᓚᐅᓂᖏᓐᓄᑦ ᒐᕙᒪᑐᖃᒃᑯᑦ ᓂᕈᐊᖅᑎᑦᓯᓂᖏᓐᓄᑦ.

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ ᖁᔭᓐᓇᒦᖅᑐᑦ ᐃᓄᖕᓂᑦ ᐊᒃᓱᕈᓚᐅᖅᑐᓂᒃ ᐱᓕᕆᓪᓗᑎᒃ ᑕᒪᒃᑯᐊ ᐃᓄᐃᑦ ᓂᕈᐊᕆᐊᖅᑐᕈᓐᓇᖁᓪᓗᒋᑦ ᑕᒡᕙᓂ ᓂᕈᐊᖅᓯᕐᓂᐅᔪᒥ. ᖃᐅᓱᐃᑦᒥ, ᓂᕈᐊᖅᑐᓕᕆᔨᐅᔪᑦ ᐊᒃᓱᕈᓚᐅᖅᑐᑦ ᐱᖅᓯᖅᑐᒥ ᓂᕈᐊᕈᓐᓇᖁᔨᓪᓗᑎᒃ ᐃᓄᖕᓂᑦ.

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ ᐅᐱᒍᓱᒃᑭᕗᑦ ᐃᓄᓕᒫᓂᒃ ᐃᓚᐅᓚᐅᖅᑐᓂᒃ ᐃᓕᑉᐹᓪᓕᕈᑎᖃᖅᑐᑎᒃ ᐅᖃᐅᓯᒃᓴᓂᒃ ᐃᓚᐅᓪᓗᑎᒃ ᓂᕈᐊᒐᒃᓴᓕᒫᑦ ᑲᑎᒪᖃᑕᐅᑎᓪᓗᒋᑦ ᐊᒻᒪ ᓂᕈᐊᖃᑕᐅᓪᓗᑎᒃ.

ᒧᒥᓛᖅ ᖃᖅᑲᖅ ᐆᒻᒪᕆᒃᑐᒥᒃ ᓂᕈᐊᒐᒃᓴᐅᔾᔪᑎᖃᓚᐅᕐᒪᑦ. ᐊᒃᓱᕉᑎᖃᕐᓂᖓ ᐃᓄᓕᕆᓂᕐᒨᖓᔪᓂᒃ ᐊᒃᑐᐃᓚᐅᖅᑐ ᓄᓇᕗᒥᐅᓂᒃ ᑐᑭᓯᔭᐅᓪᓗᓂ ᐃᓄᖏᓄᑦ ᐊᕕᒃᑐᖅᓯᒪᓂᐅᔪᓕᒫᒥ. ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ ᕿᓚᓈᕈᑎᖃᖅᐳᑦ ᐱᓕᕆᖃᑎᖃᕐᓂᐊᕐᓂᕐᒥᓂᒃ ᖃᖅᑲᕐᒥᑦ ᖃᓂᑦᑐᒥ ᓯᕗᓂᒃᓴᒥ ᖁᒡᕙᕆᐊᖁᓪᓗᒋᑦ ᐃᓚᐅᕝᕕᒋᔪᒪᔭᖏᑦ ᕿᑭᖅᑕᓂ ᐃᓄᐃᑦ.

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ ᕿᓚᓈᕈᑎᖃᖅᐳᑦ ᑲᔪᓯᓯᒪᔪᒥᒃ ᐱᓕᕆᖃᑎᖃᕐᓂᐊᕐᓂᕐᒥᑦ ᑖᑦᓱᒥᖓ ᑲᓇᑕᐅᑉ ᐊᖓᔪᖅᑳᒻᒪᕆᐊᓂᒃ ᑐᕉᑐ ᐱᓪᓗᒋᑦ ᐱᒻᒪᕆᐅᔪᑦ ᐱᒋᐊᖅᑎᑕᐅᓯᒪᔪᑦ ᓲᕐᓗ ᕿᑭᖅᑕᓂ ᓱᓕᔪᓂᒃ ᑭᒡᓕᓯᓂᐊᕐᓂᖅ ᐊᒻᒪ ᑕᓪᓗᕈᑎᐅᑉ ᐃᒪᖓ ᐊᒻᒪ ᑐᕙᐃᔪᐃᑦᑐᖅ ᑮᓇᐅᔭᐃᕈᑕᐅᓂᖓ.

ᐊᖏᔪᑲᓪᓚᖏᓂᑦ ᑮᓇᐅᔭᐃᕐᕕᐅᓯᒪᒐᓗᐊᖅᑎᓪᓗᒍ ᕿᑭᖅᑕᓂ ᐊᕕᒃᑐᖅᓯᒪᓂᐊ ᑭᖑᓂᑦᑎᓐᓂ, ᑕᒪᒃᑯᐊ ᐱᖁᑎᕐᔪᐊᖑᒋᐊᓖᑦ ᓱᓕ ᐊᖑᓐᖑᑎᓯᒪᓐᖏᒻᒪᑕ ᑕᒪᒃᑯᓇᓂ ᐃᓄᐃᑦ ᐊᒻᒪ ᐊᒥᖏᑦ ᑲᓇᑕᐅᑦ ᐊᑐᖅᑕᖏᑦ ᓱᓕ ᐊᖏᔪᑲᓪᓚᐅᖕᒪᑦ.

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ ᑲᔪᓯᒍᒪᔪᑦ ᖁᒡᕙᕆᐊᕐᓗᒍ ᒐᕙᒪᓕᒫᓅᖓᓂᖓ ᐊᑐᖅᑕᐅᓂᖓ ᑕᓪᓗᕈᑎᐅᑉ ᐃᒪᖓ ᐊᒻᒪ ᑐᕙᐃᔪᐃᑦᑐᓄᑦ ᐊᖏᕈᑦᑏᑦ ᖁᒡᕙᕆᐊᖁᓪᓗᒋᑦ ᐊᓯᖏᑦ ᐱᒻᒪᕆᐅᔪᑦ ᐱᓕᕆᐊᖑᔪᑦ ᓲᕐᓗ ᐃᑎᔪᓂ ᑐᓚᒃᑕᕐᕕᓕᐅᕐᓂᖅ ᕿᑭᖅᑕᕐᔪᐊᒥ, ᐱᑕᖃᕆᐊᖃᒻᒪᕆᓕᖅᑎᓪᓗᒋᑦ ᐋᖅᑭᐅᒪᔪᒥᒃ ᐱᓕᕕᒡᔪᐊᖃᖁᓪᓗᒋᑦ ᓄᓇᕗᒥ ᐃᖃᓗᒐᓱᐊᖅᑏᑦ.